Petru Maria : - O zì, allora issa bucciata ? A ci femu ?
Ziu Simone : - A ci femu, a ci femu... O Vincè, quale hè stu giuvanottu ?
Vincenzu Mariotti : - Ùn lu cunnosci ? Hè Petru Maria, u figliolu di Anton Ghjiseppu è di Agata Tognetti.
Ziu Simone : - Allora hè di i Tronchjuli !
Vincenzu Mariotti : - Zittu, chì ti sente !
Petru Maria : - O zì, ùn vi ne fate ! I cugnomi l'avemu tutti. Eiu sò di i Tronchjuli, ma sò manescu !
Francesca : - Hè ghjusta, eiu sò di i Sgalabati, ma à bocce, ùn mi sbrogliu micca troppu male !
Ghjuvan Paulu : - Allora, ghjucate inseme tremindui : Ziu Simone è Petru Maria. Quale ghjoca cù mè ?
Lucia : - Eiu !
Ghjuvan Paulu : - Bona ! Ma ci vole unu chì tira è unu chì accosta ! Tù chì faci ?
Lucia : - Mi piace à tirà, ma sò bona ancu à piglià u puntu.
Ghjuvanni : - Ùn vi scurdate di nunda, innò ?
Ghjuvan Paulu : - Hè vera ! Simu sei è ùn avemu chè ottu bocce. Cumu fà !
Vincenzu Mariotti : - È quelle custì, di quale sò ?
Ghjuvanni : - Sò meie ! Ste duie quì, lucciche lucciche, ghjocu sempre cù queste.
Vincenzu Mariotti : - È l'altre duie ?
Ghjuvanni : - Ancu què, hè roba meia. Pigliate le voi è ghjuchemu inseme !
Petru Maria : - Chì squatra tremenda !
Lucia : - Chì tante chjachjare ! Avà, ghjuchemu ! Alè, u minì, u lampu eiu !