Cathy CAMPANA hè nata in Canale di Verde. In casa si cantava spessu è si barattava, à rombu di pruverbii è spressione sputiche, cù una mamma assai attente à trasmette a cultura nustrale o quellu fratellu  appassiunatu pè issi canti di sempre. Tandu si capisce ch’ella si porti in sè a stampa di una cultura arradicata.

Cum’è tanti hè andata à stà fora di Corsica una manata d’anni è po si n’hè vultata à campà propiu ind’ella si sente “in casa soia felicissima”, cum’ella dice.

Hà ripigliatu i studii è chjappu i diplomi ch’ella vulia issa « militante culturale” bramosa di tene u corsu à u centru stessu di e so primure. In u 2008 ottene u “certificatu di lingua corsa" è hà perfeziunatu a so maneghja di a lingua sequitendu i corsi d’immersione porti da a CTC, è po dopu si hè scritta à l’UCPP in lettere (LCC di sicuru).

A cuscenza è primura di a creazione in corsu li vense à l’occasione di un staziu di chjam'è rispondi. È oramai hà francatu u passu è datu larga balia à u so bisognu di cumunicà è fà sparte issa passione!