Rillevate i nomi di a cità in e duie lingue usate, scuprite una particularità architetturale : interessate vi à i nomi di e torre aghjustati in drentu.

U PICCULU CARRUGHJU GOTICU DI ALGHERO

Piazza Civica («plaça del pou vell», o «pla­ça de la ciutat»), a piazza di a cità hè di sicuru cun Porta Terra è Piazza Sulis unu di i punti classichi di Alghero, appuntamentu di tutti è teatru di e manifestazione culturale.

Hè certa chì a cità sana sana si pò dì ch’ella hè carrughju goticu in issi muri, ma custindi ci hè propiu u so bellu «barri gòtic alguerés». Di fatti, trà mezu à una mansa di strette è carrughji sia paralleli sia incruciati in Piazza Civi­ca, sò alzati i palazzi goticucatalani più impurtanti: «Pa­lau De Ferrera» dettu oghje «Palau d'Albis», «Palau Lavagna» (o di a meridiana) è, di fronte à u Portal de la mar, l'antica «Duana Reial» in Piazza Civica; «Palau Guio i Duran» (oghje Peretti), Via Roma; i palazzi trà Via Carlo Alberto è Vicolo Serra; via Carlo Alberto u «Palau Llorino» o «Rossi» (oghje Adami) et u «Palau Ross» di fronte à a chjesa di San Francescu (per daretu, Via Maiorca, duie finestre, sò state ristaurate, una semplice è l’altra doppia); Via Sant'Erasmo, unu trà i palazzi più belli di a cità: tempi fà saria statu di a famiglia ghjudeia di i Carcassona, è po «Pa­lau Reial», dopu cacciatu i Ghjudei da a cità in u 1492. Ci fermanu vistighe di finestre ghjumellate delicate messe à palesu durante e riparazione recente. «Palau Tana-gons» - oghje Guillot - (duv’elle spiccanu, drentu è fora, parte goticucatalane di u xv^u seculu, puru s’elle sò duminante e forme spagnulizante di una ristrutturazione di u XIX^u seculu) in a via Gilbert Ferret; è po ci hè u «Palau Vinci» o «Tibau» in a via Principe Umberto. Dunque ùn sarà micca sprupositi di dì chì Alghero a “Barcelunetta sarda” hà, cum’è Barcelona, u so quartieru goticu?.