Civis pacem para bellum

Una stonda è pò vene u francese, imbulighjatu è francese da ingruviglià. Iè vene sì u francese, quellu di a fruntiera turchina per suminà un desertu. Una stonda è pò vene u francese, quellu di la cunquista feroce è quellu di a sculuccia di Jules Ferry. Iè vene issu francese, quellu di a ierarchia umana annant'à a terra di l'omi!

Una stonda è pò, ghjuntu hè lu francese, ghjè ellu, quellu di u putere è quellu di a sottumissione. Ghjè ellu, quellu di a furmalità di Versailles è quell'à l'orlu di u Golu. Una stonda è pò, ghjuntu hè issu francese, quellu sbuffulatu da a Tramuntana, per impiccà ne u Niolu, da suminà ne u dolu!

Aspessu sò francese, francese ch'hè culunizatu è quellu ch'è culunialistu, francese spechju di l'Algeria è l’algerianu di u spechju. Aspessu sò francese, fanduna di u mondu novu da sguassà ne u mond'anzianu, quellu strangeru chì v'hà fattu stragneru. Aspessu sò, sò francese, di l'inerzia a più prufonda, è spettatore di a storia! Iè sò francese, francese assassinu di u passatu è ghjenitore di l'avvene, defuntu di a tradizione è babbu di a mudernità.

È pò certe volte... sò corsu, corsu testimoniu di u passatu è pò assassinu di l'avvene, corsu aghjumpatu circatachjend'un'identità! Certe volte... sò corsu, corsu stambussatu da un ventu gattivu è corsu di a Diaspora di e strette di u Panier à l'ora di u mantenimentu. Certe volte... sò corsu, corsu dumandendusi " perchè sò?" chì esiliatu di mè stessu, è ruina d'una razza ch'ùn esiste più!

Guasi maì simu corsi, quelli di a terra è sfilanciati da a timpesta, quelli ingutuppati à l'appiccià di li mondi, ma corsu ùn ti scurdà: oghje à mè, dumane à tè, chì spicchenduci c'anu adduniti per u sempre...

Julian Mattei