Mansa di ghjente
In giru à un corpu chì s'addurmenta.
Immensa dolcezza
Per un parente chì si ne và.
Chetu chetu.
Tintu à culore d'artifiziu
Di stu turchinu lindu, à tempu arrusulatu è biancastru.
È pian'pianninu,
Cun visi dillicati fughjenu i sguardi.
Si danu a risa è ne sò à chjuchjulà.
Senza mancu un frastornu,
Festighjeghjanu u mo interru.

Volanu e cennere
Sottu à l'ochji sbiadati è fieri.
S'aduniscenu
Da campà un'ultimu mumentu
È per u sempre
Si ne stanu in forse.

O quantu aghju bramatu
Di parte nanzu à i mei
Per ùn esse l'eredu
D'una fiamma chì si spenghje.
È andà mi ne
Cù issu sintimu à mente
Ch'elli anu da campà
À l'eternu.
Ch'elli fianu a notte chjara
Cum'è i fochi di a San Ghjuvà
Ch'elli sianu à l'ochji aperti
Per festighjà u mo interru.

O bà, o mà, surelle, fratelli,
Quant'e vi tengu caru...
Ùn dite preghere
Chì ùn vò inlocu, v'aspettu...
A polvera campa fora di tempu...
Ci vole à stà si ne à u chjaru,
Ma balate, beite, cantate chì mi veculate...
È tandu m'addurmentu