Sò parechji in Corsica i paesi abandunati chì palesanu quant’elli sò crisciuti altri paisoli è viutate e campagne! Mata saria statu viutatu da i soi à u XVIIIu seculu.

Di prima ci vole à andà à Campu, vicinu à Luri in Capicorsu. Custindi, una lastra cumemurativa ramenta à Dumenicu Andria Cervoni cum’ellu hà pussutu dà ispirazione à u scrittore famosu Joseph Conrad.

U chjassu colla ghjustu à cantu, hè piacevule assai, difficiule mancu à pena chì gira è voga sottu à un tunellu fattu da a vegetazione chì offre ogni tantu un’ochjata nantu à u mare.

Ùn si stà tantu à ghjunghje in u paese abandunatu chì e so case in petra fermanu sempre arritte puru s’è u tempu l’hà dannighjate.

Ci sò l’avanzi di una torra quatrata, una furtificazione cun l’archere chì cura sempre l’entrata. Hè certa ch’ella ghjuvava da difende u paese.

A passighjata, si pò cuntinuà la sin’à a Punta di u Castellucciu chì offre un panorama bellissimu nantu à a marina di Santa Severa.

Vultendu in daretu, si scopre a cappella San Salvatore alzata duv’ellu ci era prima un santuariu di u Xu seculu.

Una particularità da stupisce : u campanile stà circa 80 metri più inlà.

Una surtitella piacevule assai piena à calma è serenità.