PUESIA IN PALMA DI MAIORCA

Unu trà l'appuntamenti di primura pè a puesia mediterranea

Scontri di 01.05.2005 - 31.05.2005

   U VIIu "FESTIVAL DE POESIA DE LA MEDITERRÀNIA" si hè fattu in Palma di Maiorca à u mese di maghju 2005. Biel MESQUIDA, direttore di u serviziu di e publicazione di l'Università di l'Isule Baleare, pueta, nuvellistu, scrittore è animatore culturale ci avia invitatu quatordeci pueti à barattà idee, versi, impressione di scontru è prugetti di rializazione cumune in futuru. A spressione corsa ci era dinù chjamata riunita cun parechje altre:

  • David Castillo, Francesc Garriga, Josep Lluís Aguiló, Miquel Cardell, Vicent Alonso, (catalanu),
  • Girgis Shokry, Hassan Najmi, Zuhair Abu Shayeb (arabu),
  • Larbi El Harti è Vicente Gallego (castiglianu),
  • Moshe Benarroch (ebreiu),
  • Nathalie Quintane (francese),
  • Xènia Dyakoneva (russiu)
  • Ghjacumu Thiers corsu.

  Una manifestazione preparata è curata da i pueti è varii associi è istituzione cunvinte chì non solu l’attività in giru à a puesia vanu à accresce l’apertura di l’ambiente culturale nantu à u Mediterraneu, ma dinù ch’elle sò un modu impurtante di valurizà e risolse di u lucale baleare. Hè per quessa chì u patruciniu di issu festivale accuglia a Fundació Casa Museu Llorenç Villalonga è u Departament de Cultura del Consell de Mallorca. A cunsigliera d'Educació i Cultura del Govern de les Illes Balears i Institució de les Lletres Catalanes è a Presidente di u Consell de Mallorca anu participatu à e cunferenze stampa, à e reunione publiche è a e sessione puetiche cun primura. L’affollu di isse auturità portanu testimugnanza di l’integrazione di e finalità culturale in a pulitica generale di u Guvernu baleare. Ci piace à pensà chì issa attitudine si puderà espurtà ancu da e parte nostre!

  Recitali puetichi in varii punti di Palma è di i cuntorni, scontri cù i pueti lucali è recitazione cun zitelli di e scole publiche anu occupatu un prugrama zeppu è ricevutu da a ghjente in un modu tale ch’omu induvina quanti elli sò stati l’anni di travagliu cuntinuu è decisu di l’urganizatori.
  Si ne avvede omu subitu subitu assistendu à la NIT DE LA POESIA, duv’ellu si svolge l’attu centrale di u Festivale à l’internu di u Palazzu di u Guvernu, “Pati de la Misericòrdia”. Issa « Nit de la poesia » hè propiu un mudellu da imità, in Corsica per festighjà A SIMANA DI A LINGUA CORSA, per indettu.

   In u casamentu di u Guvernu di l’isule ci hè dinù un centru culturale, i servizii di prumuzione di a lingua catalana è una grande libreria chì sparghje l’opere baleare è catalane. L’accunsentu di l’auturità publiche si hè fattu vede ad ogni mumentu di u festivale chì eranu presente pè ogni attu di u prugramma. A presidente di u Cunsigliu di l’isule Baleare, Maria Antonia Munar, a Direttrice di l’Affari Culturali è Suciali Dolça Mulet è Gemma Pascual, direttrice de la Casa Llorenç Villalonga eranu custindi à seguità è à incuragisce issa mossa puetica è culturale atta à cunvince ancu i più losci.
    Ci vole à figurà si un recitale di duie ore occupate solu cù e letture puetiche davanti à un publicu di 600 persone! È cù a cunsigna pè i pueti di leghje solu in a lingua uriginale. Ci vole à dì chì à l’entrata di a serata, u publicu trova, prontu è lestu, u libru di u festivale, cù i puemi di i quatordeci participanti in lingua uriginale cun traduzzione catalana.

    Una riescita magnifica è un esempiu da seguità. Hè sicura ch'elle passanu pè a messa in opera d'issi mezi impurtanti e valerizazione appaghjate di e lingue è di e culture. Face più u spettaculu di una spressione piena è ampia chè tutte i lamenti à nome di ua salvezza di a lingua!

Hassan NAJMI,Ghirgis SHOKRY, Xenia DYAKONOVA è Nathalie QUINTANE