Trè testi
Puesia
Scinnu
Siddu nun curri
vucii
vinci
e nun hai facci
aremi
santi
si nun si’ primu
unu
lu megghiu ...
nna stu munnu unni
siddu nun pari
nun esisti
scinnu, a li voti
a raciuppari
li mei scagghi.
Se non corri / gridi / vinci / e non hai faccia tosta / denaro / santi in paradiso / se non sei il primo / il numero uno / il migliore ... / in questo mondo dove / se non appari / non esisti / scendo, talvolta / a racimolare / ciò che di me resta.
Ritrattu
Spartitu in diesis
e bemolli
senza attaccu o finali.
Rusariu di jorna
e di notti
senza ummiri né luci.
Zimmili di chistu
e di chiddu
chi putia e nun fu.
Spartito in diesis / e bemolle / senza attacco o finale. / Rosario di giorni / e di notti / senza ombre né luci. / Bisaccia di questo / e di quello / che poteva essere e non fu.
Nun sugnu ju
Zoccu cumminasti
siddu è veru poi e pruvatu
ni rispunni a cui di duviri
in terra
e in celu;
nun sugnu ju
chiddu chi ti cunnanna.
Ju sacciu sulu
chi m’apparteni
e accampu lausu pi tia
boni palori
e suspira.
Cosa hai combinato / se poi è vero e sarà provato / ne risponderai a chi di dovere / in terra / e in cielo; / non sono io / colui che ti condanna. / Io so solo / che mi appartieni / e raccatto meriti per te / buone parole / e sospiri.