Eccu U TRENU CONTR’À L'AUTOCAR, un bellu puema pienu di sale ed irunia, cù u versu è a tematica di U LAMENTU DI U TRENU. Solu chì dopu à avè arruvinatu i carritteri, quì hè u trenu chì si lagna di esse abbandunatu. Wolfgang Laade hà racoltu stu cantu in u 1958

O lu trenu di Bastia, quantu si pienghje è si lagna,
dicendu -Hè a mio ruina, più niente si guadagna,
avale sò l'autocari chì godenu la cuccagna.
 
D' Aiacciu cum' in Bastia, si piglianu la vittura,
dicendu : -si marchja megliu è si gode più frescura.
Di lu tintu  « Trinnichellu », nisunu hà più primura.
 
- Nun mi guarda più nisunu, nè vicinu nè luntanu,
mi anu fattu la scunghjura à dà mi un colpu di manu.
Trovanu tutti la scusa ch' eiu marchju troppu pianu.
 
Piglianu tutti lu carru, bench'è li pigli di menu
mi ne vogu sempre viotu è prim' era sempre pienu.
Dentr' à le nostre stazione, ci metteremu lu fenu.
 
Avale issi troncacolli sò cumuni è generali
ci n’hè per ogni paese, è per tutti li pasciali.
Tuttu ne veni da elli, s’è l' affari vanu mali.
 
Dipoi issi cuncurrenti, li cosi ne sò cambiati,
ne soffre la cumpagnìa incun tutti l' impiegati.
Ch' elli vaghinu in malora quelli chì l'anu inventati.
 
Di more di questa morte, forse era lu mio destinu,
s'è guadagnu da lu pane, ùn aghju da piglià vinu.
Si ponu chjude le porte di lu Fangu è di Lupinu?
 
M'anu allungatu le raglie, Sulinzara è Portivechju,
ma malgradu tuttu questu, sò più famitu chè techju.
È s' ellu dura st' affare, ni seraghju prestu crechju.
 
Seria statu cuntentu di.... issi cantini,
è seria statu un bene ancu per Bonifazini.
Bench' ùn si possinu pianghje d'amicu da l' Argentini.
 
Sin'à ch'ùn anu le raglie, seranu sempre mischini,
senza cumbinazione da traspurtà li so vini.
Ch'elli li collinu almenu li vitturi d' Ollandini.
 
Chè pur mettin' un prugettu, di Manuellu Arena,
è s' ell' ùn era mortu, l' averia fattu ottene.
Ma oghje ùn ci passu più(ne) ch' ùn ni vale la pena.
 
Quantu mi hà fattu turmenti, la mio sorte maladetta,
chè mi ghjunghjenu à lu puntu di marchjà cun la sacchetta.
Ancu dopu trecent' anni, lu Corsu face vendetta.