A RISERVA DI U SPIDALI

Cullate è cullate è po di un colpu, cascate nantu à u lavu di U Spidali. Hè un lavu artifiziale, ma ùn pare mancu à pena. Di megliu ùn pudia esse chè cusì! Simu in altura, à pocu pressu 950 metri, dimu 1000 è femu la finita. Di veranu quand’ellu hè colmu colmu u sbarramentu, dicenu ch’elli sarianu 3 miglioni di metri cubi d’acqua. Tandu ch’elli ùn ci rompinu e stacche cù a sicchia. Avà, ci vole à dì chì hè a riserva d’acqua principale di a regione sana di Portivechju, è chì a pupulazione di issi lochi cresce assai ghjustu à puntu quandu l’acqua hè più scarsa. Bona, ma nimu vi hà da impedisce s’è vo vi vulete ciuttà una cria, sottu à issa ritenuta ch’ella empie L’Asinau.