U passu chì ci pensu avà, quessu ùn sò s’ellu hè “un ricordu veru o falsu » ma si appiccia à un avvenimentu di u fora accadutu mentre unu di i mo spiazzamenti abituali trà Bastia è Corti (fine di l’anni ottanta).

Sò in vittura solu solu. Vecu (o credu ch’o vecu?) una cosa strana: una statula bianca bianca di a Madonna cù u bambinu in una barca chì sguilla à nant’à un mare di capochje! Di prima una cria spaventatu, dopu si riflette... Alè ! Si sgoba troppu, sò strapazzi, si pianta. Si rifiata... Una sigaretta. Ũn ci hè più nunda. Si ripiglia a strada.  Si face i so corsi, omu si scorda... U lindumane, dui ghjorni dopu? Più tardi ? Ùn a sò - listessu puttachju. Forse di menu visione chè un sforzu incuscente di ricurdà si, sta volta. U fattu si stà ch’ella volta listessa maghjina, in listesse circustanze, ma senza stupisce si. Oramai aghju decisu d’andà à circà a suluzione.
.Mi accade ch’o ne parlu cun Mamma ch’era sempre viva à iss’epica. Mi risponde ch’ella li face ramintà a Vierge du grand retour. Ma cosa ghjè? Mai l’aghju intesu ammintà! Mi risponde à pocu pressu... Una prucessiò tamanta chì traversò a Corsica ind’è l’anni dopu à a Guerra. Ammenta a folla di ghjente, scene di devuzione di un altru tempu è po’ a statula chì passa è a folla chì l’aspettava in giru à a chjesa di Santa Lucia duve l’aspettava a pupulazione sana sana. Sangula miseria, ma hè bella sicura! A Vergine! U bambinu ! Un mare di ghjente ! Ùn aghju vistu u pianu di u camione duv’ella era stata imposta a statula! Ma quandu era, o mà? Quandu era? 
In 1946 o 1947. Tandu, t’avia in collu
Eccu! Basta è ùn ci vole di più per chjaravallà è sunnià. Eiu sò natu in 1945. Allora, cosa era : u mo ricordu più vechju ?...
Sfurmazione prufessiunale. Tandu pigliu è mettu à fà una vera inchiesta « scentifica » : giurnali, culleghi suciolughi è etnolughi, l’artiglieria sana di u « scentificu » è scopru l’odissea di Notre-Dame de Boulogne… prima è dopu à a Guerra, in Corsica (d’aprile di u 1947 à ghjennaghju 1948) è po’ dopu partenza pè a Martinica (Ò ! Ò !). U mo amicu Enzo Pace (suciolugu spezialistu d’istoria à l’università di Padova) mi risponde senza tirà colpi : «Questo è una cosa molto conosciuta : è la madonna pelegrina » .  Chì stupore : mi conta cumu a Santa Sede è CIA anu fattu spassighjà issa statula nant’à e terre chì eranu passate à u cumunisimu durante a Resistenza. Una vera campà per travaglichjà un’imbrogliu! Sfurmazione prufessiunale: eo mi mettu à fà un’inchiesta vera, propiu “scentifica” . 
A seguita hè un’a bella storia : un’inchiesta degna di scuparte è l’elaburazione di un rumanzu publicatu di marzu 1996, è po’, unepochi mesi dopu, eccu ch’o leghju quellu di Raphaël CONFIANT : La Vierge du Grand Retour ! È dopu parechji anni eccu u filmu di  Serafino FASULO di Livorno : La Visita! Ma chì piacè !  Chì campa! Cumu si dice nantu à u teatru !

Ghjacumu Thiers