Paesi abandunati, u so pocu è tantu, U Capicorsu l’hà ancu ellu. Puru s’ellu ùn ci ne era caracu sopra à locu -ma a tupunimia ella a saperà perchè- Caracu, paisolu di u paese di Meria à pocu à pocu hè statu lasciatu per via ch’ellu era più difficiule à ghjunghje ci chè in u paese principale. À chì a face issa piccula passighjata hè ciuttatu in un passatu recente.

U chjassu, à volte accintu da belle muragliette in petra à l’asseccu, gira, gira è rigira à fiancu di pughjali è apre a vista ver’di l’isule tuscane, ma dinù e trè isule emblematiche di Macinaghju : Terra, Mezana, Finuchjarola.

Quellu ghjornu in primu postu, ci hè l’isula di A Gurgona, ancu di più à nordu chè Capraia.

Ci vole pocu tempu à ghjunghje in Caracu è i resti di e so case chì t’anu sempre vistiche di a vita pocu fà: forni, curnichje pitturate. Dopu à un giru in furia, ma fendu casu quantunque chì u locu hè trafalatu, si pò ghjunghje nantu à un’aghja da fà merendella di fronte à u mare. Ma a calma d’issi lochi hè un sbagliu, chì à l’entre di u paese dicenu ch’ellu saria accadutu un fattu orrendu, unepochi di decennii fà. Un figliolu di ghjente bè, ma malfattivu averia messu male una serva di casa. Dopu l’averia ammazzata è strippata à l’entre di u paese… Sarà verità o legenda ? In issi lochi a mente ùn stà tantu à girà e sette chjappelle.