Issa passighjata hè cunnisciuta pocu è micca. Hè par via chì ghjustu à cantu ci hè u famosu GR 20. Si tratta quì di ghjunghja sinu à un stagnu situatu trà i stazzi di Todda è u rifugiu di Petra Piana, u stagnu di Ghjallicatapianu, situatu à 1523 metri d’altitudini.

Si parti di fronti à i stazzi di Todda suvitendu u GR20 nantu à quidda pista furestiera magnifica. L’itinerariu hè splendidu è calmu cum’ùn ci n’hè in altrò. U chjassu và renti à u fiumi è piacevuli hè, ancu di statina. Di quandu in quandu si passa davanti à vaschi naturali magnifichi è, in piena staghjoni, ùn si ricusaria di ciuttà si ci nentru.

Ver’di i 1200 metri d’altitudini, si franca u fiumi duv’eddu ci era un anzianu ponti (quì  ci voli à circà i cairns) è si suvita nantu à un falamentu di tarrenu un chjassu chì ùn stà tantu à attippà. In cima d’issa pendita, si vedini i stazzi di Ghjallicatapianu chì una parti pari ch’eddi sianu sempri aduprati.

Ma si cuntinueghja à cuddà è eccu ci prestu in un circulu di muntagni chì à u mezu ci hè una bedda piana accinta d’un alzetu. In fondu in fondu eccu u stagnu, una cria sfurmatu da dui tratti di ventu chì passanu quindi è culà. U locu propiu da fà si un’arretta cù u cantu di l’aceddi è di u vinu chì sguttuleghja in i bichjerini... Sarà u paradisu ?