Passighjata in Capicorsu à sculinà tutti i so secreti

Siscu hè una cumuna di Capicorsu chì hè particulare per via ch’elli a cumponenu unepochi di paisoli chì mancunu t’hà u nome di « Siscu ». Ingiru à issa cumuna, ci sò e muntagne chì facenu u limite di una valle. È tandu, si puderia dì chì « Siscu ». hè u nome d’issa valle.

Da scopre a cumuna, i so secreti è i so tesori, ci si hè tracciatu un percorsu pedagogicu. Face u giru di tutti i paisoli passendu pè i boschi è a machja. A strada ùn si vede chè quand’omu a franca, è quessa dà l’impressione di sculinà unepoche di case appicciate, dopu à una girata, propiu à mezu à i boschi.

In un scornu di una strada in u paese di Moline, eccu ci davanti à u pannellu chì face vede u chjassu. Omu si pò ingarà à cantu è po dopu parte pè una passighjata di duie ore è mezu.

Duie chjese, parechje cappelle chì certe sò private, un anzianu cunventu, un castellu, torre genuvese, una torra quatrata, un centru equestru, un alivetu, belli casamenti è case, carrughji è forni fatti in petra di i tempi .

Via, sò una mansa di cose chì da issa visita di a cumuna ne anu da fà un piacè ch’omu pò sparte in famiglia è cusì amparà ne di più in quantu à l’architettura di i paesi di Corsica.

Longu à issa passighjata sana si và trà 200 è 500 metri d’altura è ùn mancanu i belvederi da prufittà di a vista ch’elle ci offrenu isse creste d’issa cumuna atipica.