Issa scappatella balanina hè una piccula spassighjata faciule faciule chì ci porghje un panorama da cullà vi in capu è mette à dossu u giravì.

Vicinu da a penisula di A Rivellata ci hè una di e trè cappelle di a cità calvese : A Madonna di a Sarra.

Dapoi u XVu seculu prutege a cità di Calvi, impalcata cum’ella hè quassù nantu à a cullettula chì hà listessu nome.

A cappella di a Madonna di a Sarra hè unu trà i santuarii di a cità.

Custruita in u 1479, hè stata lampata in pianu durante l’assediu di u 1794, chì l’Inglesi avianu sceltu a cullettula sopra a baia per via di a so pusizione strategica. A cappella attuale hè stata edificata trà u 1850 è u 1860, nantu à e ruine di l’anzianu santuariu.

U so pelegrinagiu di l’8 di settembre festighjeghja a nascita di a Madonna è ferma in Balagna una data chì ùn si pò mancà.

A so pusizione porghje dinù una vista chì ùn si pò tuppà nantu à a cità è i so cuntorni. Quasi appiccicatu à a cappella ci hè un pentone indrentu à l’accinta di u locu di pelegrinagiu, è custì ci hè posta una statula di a Madonna, e bracce aperte ver’di a cità, cumu da prutege la.

Una legenda dice chì s’è vo ci purtate l’omu o a donna di a vostra vita, a vostra storia inseme sarà longa è bellissima…