Vincenzu Mariotti : - Aghju da andà in Patrimoniu à piglià mi una damisgiana o duie. Vulete qualcosa ancu voi ?
Ziu Simone : - Micca per mè. Ùn possu più oramai, ma qualchì buttigliaccia, hè megliu sempre à avè la in cantina.
Lucia : - U vinu oghje hè unu trà i prudotti più cunnisciuti di a Corsica. Ci hè a qualità.
Petru Maria : - Ci era ancu prima, a qualità. A differenza hè l'urganizazione. Prima ùn si era sicuri di nunda. Ci era u sapè fà, u ghjudiziu, l'arte di pruduce un vinu squisitu, fine o generosu.
Lucia : - Chì credi ? I viticultori muderni soca saranu sbarcati da a luna ? Ùn sò figlioli è figliulini di quelli di eri ?
Ziu Simone : - Pè u più sò cusì, è l'altri dinò pare ch'elli sianu...
Vincenzu Mariotti : - Iè, eiu aghju dui nipoti nati è allevati in Parigi. È bè, dece anni fà sò vultati dopu fattu e scole agricule. Anu rinnuvatu è messu in pruduzzione un vignetu à l'abandonu.
Francesca : - È avà hè l'impresa più ricca di u circondu.
Ghjuvan Paulu : - I Gelormini. Una casata sputica di quallà. Sò amichi. Ci vidimu pocu è micca chì anu sempre da fà.
Lucia : - A` puntu, hè l'occasione. Aghju telefunatu è ci anu dettu di stà à dorme. Anu duie camere libere. L'estate e danu à pigione.
Ghjuvan Paulu : - Cù u benefiziu di l'ultima stagione anu rifattu a casa paterna.
Ziu Simone : - Allora, purtate mi ancu à mè. Ùn beiu ma cantà, cantu ancu eiu !
Ghjuvan Paulu : - È eiu songu, purteraghju a chitarra.
Lucia : - Zittu vè ! Tandu eiu mi ne stò quì !
Ghjuvanni : - O Ghjuvan Pà, lascia la dì ! Burla : basta ch'è tù apri a bocca è ti stuzzica !
Ghjuvan Paulu (ridendu) : - O Lucì, fà pianu ! Ch'è tù ùn torni cum'è certi vini ! Punghjenu è dopu sò acitosi !