Lucia : - U cunnosci quellu quallà ? A so faccia l'aghju digià vista !
Petru Maria : - A` a telè ! Hè Angelo Rinaldi di l'Accademia francese !
Lucia : - Aù ! Quessu, ùn hè un corsu, hè un scrittore francese. Riveritu sì, ma criticatu assai.
Ziu Simone : - Vai chì a si sarà cerca ! In issu mondu di l'arte, ùn sò chè impinnate è zingate !
Petru Maria : - Hè propiu ellu, ti dicu. Ma sarà quì incognito. Ùn si vole fà ricunnosce.
Ziu Simone : - I Corsi celebri è famosi sò stati parechji. In Corsica è fora di Corsica.
Vincenzu Mariotti : - Sin'à u dicennovesimu seculu si facianu ricunnosce in Italia.
Ziu Simone : - Duttori di i papa, prufessuroni in Pisa, Roma è in altrò.
Vincenzu Mariotti : - Marinari pochi, mi pare
Francesca : - Dicenu cusì, ma eiu aghju i parenti stallati in Venezuella dapoi duiecentu anni.
Ghjuvan Paulu : - Saranu di ceppu capicursinu. Anu empiutu tutta l'America latina.
Vincenzu Mariotti : - È l'Induscina, è tutte l'anziane culunie di a Francia.
Ziu Simone : - Ùn hè micca stata listessa cosa. Da più à menu, da l'anziane culunie sò vultati i Corsi...
Lucia : - Micca tutti. È po chì dite di tutti quelli chì sò emigrati in i Stati Uniti...
Ghjuvan Paulu : - Senza andà à circà cusì luntanu, quantu saranu i Corsi in Marseglia ?
Ziu Simone : - Ùn hè micca stata listessa cosa. Quessi, una meza ora in aviò è sò in casa !
Vincenzu Mariotti : - Ùn hè micca stata listessa cosa ! Un Corsu hè un Corsu è un omu hè un omu !
Lucia : - Ci sarà ancu da annerbà si, andate puru. Avete a ragiò tremindui. Dimu : hè listessa è ùn hè listessa.
Ghjuvanni : - Si dipende : ci entre ancu a lingua, a manera di campà, i sentimenti..
Ghjuvan Paulu : - e tradizione, i prugetti, è ancu l'ecunumia !
Vincenzu Mariotti : - Tuttu què hè bellu è bonu, ma un Corsu ùn si scorda di a filetta.
Ziu Simone : - Puru luntanu, puru dopu à anni è anni...