Da u principiu di u XIXu seculu à oghje, a pupulazione corsa s’hè sviluppata segondu trè periudi maiò.

Durante u XIXu seculu, si vede una crescita senza arretta. Ghjunghjimu à un massimu storicu à u mumentu di u cambiamentu di seculu firmendu ghjustu sottu à i 300 000 abitanti.

Da quì, a Corsica principia una crisi demugrafica. A calata hè à bastanza debbule fin’à a guerra di u 14, ma dopu piglia prupurzione assai più impurtante. A guerra, digià assai pessima per a Corsica, vene à dà l’abbriu à u sbiutà di l’isula chì andarà fin’à l’anni sissanta. In causa quì, hè u bilanciu immigrazione/emigrazione chì hè assai sfavurevule. Culunie, impieghi in l’amministrazione in cuntinente, vita mischina in Corsica, pocu sviluppu lucale, tutte ste ragiò spieganu u bilanciu negativu assai di u flussu migratoriu. Fatt’è fine chì in u 1954, u censu generale in Corsica li dà una pupulazione di 191 500 abitanti. Vole dì chì, in menu di un seculu, si perde circa un terzu di a pupulazione.

Dapoi tandu, nasce una nova fasa di crescita demugrafica. Sta crescita hè massima trà u 1962 è u 1968 (+ 2% di media annuale). Hè stata nutrita da un’ immigrazione forte da l’Algeria cù u fenomenu di i rimpatriati ghjunti massi in Corsica, dopu à l’indipendenza algeriana, à sfruttà e terre agricule di a piaghja urientale. Ancu puru s’ella si ralenta appena dopu, a crescita cuntinua quantunqua, sempre nantu à fenomeni d’immigrazione (ghjente cuntinentale è migrazione nove cum’è maruccani è purtughesi) chì u soldu naturale (vene à dì u bilanciu trà nascite è morte) ferma debbule.

Ma a crescita glubale marca quantunqua un spiazzamentu di pupulamentu assai à favore di e zone periferiche di e cità è u litturale à discapitu di i paesi di l’internu.

Fatt’è fine chì, à u censu di 1999, a pupulazione corsa hè turnata à cresce à 260 000 abitanti cù una crescita di 0,43% trà u 90 è u 99 (circa 10 000 a) duvutu supratuttu à u flussu novu di migranti.

(Fonte INSEE – TEC 2001)