Salvatu mi da e frebbe di a zitellina curria nantu à e mo acque
Curava paisaghji. Ghjunghjianu l’acelli. Fiori rossi…
Ma digià u balsamu di e voci inde l’ansciu tardivu di a mane.
Curalli pinzii straccianu a pelle di u ghjornu.
U celu serra e so ale. Cascanu passere è cuscogliule.
Vense l’acqua. Svarsava i so visi smemuriati
Stringhjendu nantu à un pettu stralavatu dui crisantemi sbiaditi.
Ùn vogliu fiori, dicii tù. Ùn vulii a pena
Di a bellezza chì ghjemba e so coppe à a guazza nuttinca.
M’ai lampatu à dossu a pula di i to ochji
M’ai cercatu. Sarà statu amore ?
A punta di u to sguardu
Inficca torna ind’u mo core a cultella avvelenata.