LLUÍS SALVADOR,

ARCIDUCA D’ÀUSTRIA HABSBURG-LORENA È BURBONE

(Natu in Firenze u 04-08-1847 – Mortu in Brandeis u 12-10-1915)

L’orígine

Figliolu di Leopoldu d’Habsburg-Lorena, príncipe imperiale d’Austria.

Lluís Salvador ùn avia micca i modi di esse cum’ellu si pò pensà di unu di una famiglia cum’è a Casa d’Habsburg. E primure è i centri d’interessu chì u muvianu sò di quelli chì stupiscenu ind’è l’alta noblesa: scenze naturale è arte di a navigazione.

Dopu a demissione di u babbu à favore di u so fratellu, si hà da pudè cunsacrà à isse passione

Avendu cuminciatu à viaghjà moltu giovanu è à mette per iscrittu e so impressione di viaghju, ghjunghje pè a prima volta à e Baleare in u 1867. Avia solu vinti annu. Hè subitu ammasgiulatu da l’arcipelagu di e Baleare è ci si stabilisce da u 1872 à u1915 in a prupietà di Son Marroig, vicinu à Deià, u so primu acquistu duv’ellu scrisse a so opera più impurtante: Die Balearen. Avia vicinu, in a costa turmentata cù scogli è grottedi a Foradada u so yacht u Nixe, chì cun quessu partì à scopre tuttu u Mediterraneu.

U scrittore maiurchinu Lluís Ripoll dice chì l’arciduca avia ingiru una corte culurita assai, cumposta d’omi èdi donne, cani, scime è tante altri animali. Dice “Omu cridia di truvà si ind’è l’Arca di Noè».

U primu «verde»

L’arciduca si hè mossu assai pè a cunservazione è a salvezza di l’ambiente naturale.

Ùn lacava taglià l’arburi in e so prupietà nè tumbà l’animali. A ghjente di l’isula ci sapianu fà pè i so tornaconti è ùn era rara chì l’arciduca li cumpressi un pezzu di terra o di machja ch’elli facianu nice di vulè sbuscà.

E più rapresentative di e so prupietà eranu: Miramar, Son Galceran, Son Marroig, Son Moragues, Son Ferrandell, Son Gual, Son Gallard, sa Font Figuera, sa Pedrissa i Can Costa. Fece gran travagli in Miramar, Son Marroig, in Estaca. Fece fà miratori è cappelle, tuttu un itinerariu di chjassi chjamatu «camí de l’Arxiduc».

Lluís Salvador si accunciò bè cù u stile di vita di l’isula. Vestia quasi sempre i panni paisani è parlava perfettamente u maiurchinu è u scrivia dinò. Si hè attalentatu à fà cunnosce l’opera maiò di u catalanu Ramon Llull, (1235-1316).

Catalina Homar

In u 1872 Lluís Salvador face cunniscenza cun Catalina Homar, nativa di Valldemossa è figliola di un ebenista. A giuvanotta subitu subitu face vede una primura stupenda da mette si à paru cù l’arciduca: ampara u francese, l’alemanu è u talianu è l’accumpagna in e so spedizione: isule Inoniche, Cunstantinopuli, Palestina, Egittu è à u largu di a costa africana.

Jules Verne

Lluís Salvador face un giru di u mondu un pocu senza vulè la, in cinque mesi. Per fà una visita à a mostra Universale di Melbourne passa pè u canale di Suez, Ceilanu, l’oceanu indianu, l’Australia, l’oceanu Pacificu u continente Nord-americanu, New-York, Liverpool è torna in Maiorca. E circunstanze d’issu viaghjone, cù a relazione publicata l’annu stessu in u 1881, facenu pensà à l’opera chì avia scrittu in u 1873, U giru di u mondu in 80 ghjorni.

I dui omi facenu cunniscenza dui anni dopu è u rumanzeu farà una critica assai laudativa di a descrizzione di e Baleare scritta da l’arciduca.

A grande munugrafia in quantu à e Baleare

Les Balears il·lustrades i comentades (Die Balearen in Wort und Bild geschildert) hè una opera in sette vulumi, editata da Brockhaus di Leipzig trà u 1869 è u 1891. Oghje chì ghjè oghje porghje tante infurmazione in quantu à a storia, a cultura è e tradizione di l’arcipelagu.

A difesa di u patrimoniu

Hè statu l’arciduca unu trà i primi prumutori di u turisimu à e Baleare.

Durante l’ultimi anni di a so vita fece fà à l’arice di u caminu chì và in Deià una Posada. Hè un albergu chì accoglie i viaghjatore trè notte. A fauna è a flora intatta di e so prupietà, situate longu à a costa salvatica è rumantica di u Nordueste di Mallorca saranu un allusingu tremendu pè a ghjente appassiunata di natura. È oghje si pò sempre andà longu à i chjassi di issu «rei de Mallorca».