Si sà chì ci hè sempri stata a ghjenti in Corsica. A prova si ni hè chì ci l’anu fatta à ghjunghja sinu à no i vistighi lacati da l’omi di u niuliticu.

U rughjonu di u Taravu hè riccu d’issa storia è prisenta parechji siti aparti à chì i voli visità. Pitrettu è Bicchisgià hè un puntu ideali da parta à scopra i trè siti storichi.

Situ turreu di Balestra

Hè situatu dopu à u paisolu di Calu in Pitrettu Bicchisgià. Ingiru à u situ ci sò custruzzioni più ricenti (muri è paddaghji) ma ferma quantunqua stupendu. Postu nantu un prumuntoriu, l’edifiziu hè tondulu (pari una torra) è altu circa dui metri. I dui cavità indrintu saranu ghjuvati da metta si à l’agrottu.

Situ megaliticu di Settiva

U situ, ùn ci si pò ghjunghja à faciuli da ch’iddi sò stati fatti travagli à nantu à a naziunali. ma l’accessu hè pussibuli chì si pò passà pè una pista -chjusa!. Sottu à un arburu, un dolmen è un menhir sò dritti è maestosi, tramindui sò datati di u bronzu anticu. Un chjerchju in petra faci accinta à l’insemi. U dolmen saria ghjuvatu da tomba cullettiva.

Situ torreu di Foci

Vicinu à quissu, ma sta volta nantu à a cumuna d’Arghjusta, issu situ ci si ghjunghji più faciuli. Alzatu nantu à un cantonu arrittu, l’edifiziu, in data di l’età di bronzu (IIu seculu prima di G.C.) hà 16 metri di diametru. In Corsica, quissa hè a custruzzioni turrea più maiò è più cumplessa. I scavi fatti sopr’à locu insegnanu ch’iddu saria statu un situ rilighjiosu duv’iddu si facia l’offerti sacri o allora una sipultura.