Passà pà Carbuccia sottu à u soli
L’Alta Gravona si scopre per mezu di l’anziani chjassi di a muntagnera
![](https://interromania.com/sites/default/files/styles/image_548xx/public/img_18121.jpg?itok=QictZZ5q)
Issi chjassi, prima l’usavanu quelli chì stavanu in i paesi, in particulare i tragulini è i paisani. Facenu a leia trà un paese è l’altru è passanu pè i lochi chì oghje ùn ci và tanta ghjente. Dopu à u chjassu di u patrimoniu chì unisce Peri à Carbuccia, a signalizazione cuntinueghja in direzzione d’Ucciani franchendu à Carbuccia. Nantu à issu chjassu ci si pò ghjunghje dinù da a gara di Carbuccia sequitendu a signaletica gialla. A passighjata ci porta à u centru di u paese è ci permette di scopre i so punti propiu interessanti. Dopu si tira avanti passendu pè e pascure duv’ellu si face cunniscenza cun tutti l’animali mancu à pena salvatichi chì si avvicinanu da e serrende. Si ghjunghje à a strada d’Ucciani passendu pè i boschi pè un bellu chjassu accintu di muragliette in petre. Si pianta custindi ma… u chjassu cuntinua in direzzione d’Ucciani è po dopu di Tavera…
Strada facendu, eccu una piccula cappella, a Capedda di Sant’Anna, è dinù un pannellu da spiicà issi lochi:
Una anziana chjesa di pelegrinagiu
A prima chjesa di Carbuccia, “San Sulvestru” hè stata abbandunata à l’XIu seculu chì hè statu edificatu u primu santuariu di San Ghjacumu, l’apostulu San Ghjacumu, in quellu fervore di i primi viaghji di Corsi chì andavanu in Cumpustella. Hè propiu nantu à issu locu ch’ella fù di prima custruita una chjesa di stile rumanu, una semplice nave à rettangulu cù un’abside in mezu chjerchju, è chì ùn stà tantu à diventà un centru di pelegrinagiu pè a valle sana… nantu un veru « chjassu corsu di San Ghjacumu ».
Un santuariu rifattu parechje volte
Issa chjesa à pocu à pocu hè stata ingrandata è po rifatta sana sana à u XVIIu seculu nantu un pianu à rettangulu cun coru quatratu è cappelle laterale. Ver’d’issi tempi hè statu alzatu l’altare magiore baroccu cun baldacchinu di stucchi, supranatu da curnichje in pagoda, carattaristicu di una reinterpretazione lucale “nucente” è strampalata d’un stile tandu assai à a moda in Cismonte è in Italia. À issa epica custindi si fece dinù l’arca, a tomba à volta chì ghjuvarà da sepoltu cullettivu à i Carbuccesi.
Una cappella cumemurativa
À u XIXu seculu, issa chjesa hè trafalata è troppu luntanu da e case. Si decide di custruisce a chjesa maiò attuale à u centru di u paese, è di lampà l’anziana da ghjuvà si di u locu pè u campusantu. Ma si tene u coru è l’altare trasfurmati in cappella. Cumu u titulu di a parochja rivene à a chjesa nova, u titulu di San Ghjacumu li si hè dinù trasferitu è a chjesa attuale tandu riceve u nome di Sant’Anna. Hè celebrata tutti i 26 di lugliu