À pochi chilometri da Aiacciu, ci hè un pocu è tantu di monte chì vi impressiuneghja per via di a so dimensione è lascia à bocca aperta ognunu chì a ci face à allungà si la, ammirendu u so splendore. Issu arcefalu, chjamatu di solitu « Scogliu di i Gozzi » o « Monti Gozzi”, suprana u paese d’Afà è i so cuntorni. Cumu un pezzone di scogliu chì si vuleria sbaccà da u restu, spicca da a muntagna è si distingue cù u so culore d’ocra è senza nisuna virdura.

Da principià, si parte da u paese d’Appiettu. Ùn hè tantu difficiule a passighjata, ma quantunque ci tocca à prevede l’acqua è mette i scarpi boni. Nantu à a pista da duv’ellu si parte, si vede issu arcefalu di petra luntanu, è dinù a valle di A Gravona sana sana. À l’ueste, e muntagne è u mare; à l’este, ùn ci hè nunda altu à bastanza da pudè ci piattà a vista. Si suprana a piaghja. Ma ùn ci vole à piantà cun stu primu panorama, è turnà à attippà.

Eccu lu, eccu a cima, di un colpu u decoru cambia. Ci era a machja zeppa è accugliente mancu à pena, ma avale omu si ritrova à mezu à un giardinu tamantu (verde da più à menu, secondu à a stagione). À mezu à issa spianata ci hè un vechju casamentu in petra, ma per disgrazia ùn hà pussutu suppurtà u pesu di l’anni è ùn ferma chè a struttura. Vistica di l’epica chì in e muntagne, ci eranu i pastori.

A rocca ùn hè luntanu. Si pò avanzà sinu à in punta in punta. Torna unepochi di centimetri è si cascaria à l’inghjò. À settecentu metri, in cima à u Gozzi, nantu à u spinu di issu arcefalu, u spettaculu vi piglia in pettu.

A ci allunghemu una stonda da gode ci a vista è piglià i ritratti ch’ùn ci vole à mancà. Dui filanci giranu à qualchì metru insù. Quand’omu riparte si vede altre vistiche, soca una furtificazione o i fundali di una torra.