Sia tù stessa
Ùn sì un camaleone, scambiandu di culori
Per piace à l’altri, hè un’ illusione.
Sia tù stessa, sputica è vera,
Ùn t’inturchja micca, ùn ti rompi micca.
Interessante, piacevule, distrattiva ?
Isse parolle ùn ti definiscenu micca.
A to voce, i to sintimenti, lascia li alzà si.
Spechju sciappatu
In un mondu chì gira à rompe chjavette è frombu,
Duv’è l’infurmazione ci annega, sbambanati, tutti simu,
Cunnettati, ma persi in ‘ssu mare immensu,
Un battellu senza bussula, senza rifiatu, ciambuttatu.
Spechju sciappatu, sprindori difurmati, dilusori,
Un mondu in equilibriu, fragile è pienu di pauri,
Si cerca un sensu, una stella, un fanale luntanu,
Ma l’avvene hè incertu è i chjassi s’intricanu.
Inugualità spalancate, spaffature, ci alluntanemu,
U lamentu di l’anima
Core à pezzi, anima in strappella, prigiunera,
D’un amore illusoriu, induve u mo core invanu more.
I to ochji, duie stelle luntane, splendenu in un celu scuru,
Cum'è duie lacrime chì cascanu in u mare,
Ignurandu u mo focu internu, ardente è puru.
Un filu di speranza, tenuu, fragile, si ballotta,
Pace è Salute
À tutti voi è i vostri cari.
D’un’altra banda, s’ella vi garba a pruduzzione culturale pè a vostra spressione, vi accuglieremu cun piacè tamantu s’è vo site pronti à fà cunnosce parè o creazione in e nostre messe à ghjornu, chì quesse -peccatu!- ùn saranu più à ogni settimana cum’è prima, Ma pruveremu à fà le subitu ch’è no a puderemu...
Nata in u 1993, BALDI Letizia hè insegnante in CP/CE1 è hè direttrice di a scola bislingua è immersiva di u Viscuvatu. Attempu, hè formatrice à l’INSPE di CORSICA.
VENTU DI LIBERTÀ
Sottu à u celu turchinu, induv’è l’acula stantara
Un’isula ribella, un mughju in l’altezza si n’alza,
Da e muntagne à e piaghje, un stucciu di bellezza
A Corsica, a nostra terra, a nostra identità.
Ventu di libertà, soffia nant’à nostra terra,
Versu à un futuru radiosu, porta u nostru sperà.
Uniti in a lota, seremu più forti,
Per, di a nostr’isula, l’avvene custruì.
UN VENTU NOVU
Sottu à u celu turchinu isulanu,
Un soffiu novu hè natu.
Dopu à seculi di suffrenza
D’isse catene emu da liberà ci.
L’antenati ci anu trasmessu
L’amore d’issa terra benedetta
Aiò chì hè ora di ripiglià u nostru destinu in manu !
SUFFRENZA
In a to ombra, mi perdu
À circà u to fulgore, u to sguardu.
U mo core incatenatu spera
Di tè un chjarore, un’accinnata.
Dipendenza, dolce suffrenza
Sì u mo sognu è a mo pena.
In e to bracce m’abbandonu
Ma senza tè mi sprufondu.
Ogni silenziu hè un cultellu
Chì taglia l’aria è a mo anima,
I ricordi ardenti, ecu
Di u nostru amore, d’issa fiamma.
Dipendenza, dolce suffrenza
Sì u mo sognu è a mo pena.
In e to bracce m’abbandonu
Ma senza tè mi sprufondu.
