Cità crude è donne strane fochi spenti amichi ingrati
filastrocca è caimena di tanti ghjorni passati
cità donne d’una volta è cumpagni sminticati

cum’è chjudata à ribattò
è pà lu sempre in mè sepolta
a zitillona d’una volta
chì fece soffre è si ne andò
ind’un sognu sempre rivolta

cità quella indiavulata pien’ di fole è di canzone
è quill’altra chì brusgiava è di sole è di passione
oghje sò cennare sparte par carrughji senza nome

à mori mori cità sceme
spazza lu ventu li stradò
cum’è lu ventu ch’asciuvò
i camin’ di Ghjerusaleme
viacruce di la passiò

maga Circea è Calipsò di varii porti le catene
Nausicaella chì l’amò u rè infelice si ne invene
ligatu à la verga maiò par sente cantà le sirene

di vita è morte è libertà
l’andà di l’omu è lu so stantu
cù l’amicu tinutu tantu
ne turnaremu à raghjunà
ghjunti à truvacci in campusantu

Donne amichi è poi cità filastrocca di li ghjorni
frizione à lasciamistà spiranza di li ritorni
eccu lu me viaghjà ed eccu li me sughjorni