I ZITELLI DI LINAGLIE

In un paisolu di Canari, annidatu trà mare è monti, si hè intesu una storia strana è tragica. Linaglie hè un locu pitturescu, cù e so vechje case di petre secche è una torra quadrata tamanta chì parenu d’avè vissutu seculi di gioie è di dulore ma dinù d’esse stati spettatori di parechje battaglie contr’à i nemichi.

A torra quadrata di Linaglie, custruita versu à u XIVimu hè una torra di difesa cume si ne trova in tanti paesi di Corsica. A torra è u paisolu funu distrutti da  l'Amiragliu talianu Andrea Doria in u 1554 mentre  a cunquista di a Corsica da i genuvesi è in Canari, in rapresaglie per u sustegnu datu da certi signori à Sampieru è i so abitanti anu avutu à fughje per rifugià si in Canari è in Barrettali.

Eppuru, daretu à ‘ssu rusticu incantu c’era un misteru prufondu chì turmentava i Canaresi. U paisolu di Linaglie era quantunque particulare. Omu dicia chì tempi fà, ci campavanu zitelli sferenti di l'altri zitelli, in u so aspettu è u so cumpurtamentu. I so ochji riflettianu a saviezza inspiegata, una saviezza assai oltre a so giovana età, ma chì parianu vioti è senza vita. Si dicia chì eranu nati cù cicatrice strane è ferite chì ùn guariscianu mai. Ferite chì parianu sempre fresche, cum'è s'è u tempu s’era fermatu per elli. Eranu vestuti di stracci d'altri tempi è caminavanu scalzi.

U paese era sempre circundatu d’una nebbia zeppa è misteriosa, una nebbia cusì densa chì sguassava i limiti di l'orizonte, rendendu impussibule di vede aldilà di i so cunfini. I zitelli ùn si ricurdavanu di ciò chì era al di là di a nebbia, o ancu s'ellu ci era qualcosa oltre quellu velu stranu. U so mondu era cunfinatu à Linaglie, cù e so case di petre grisge è a so torra quadrata.

I canaresi eranu spaventati da u locu è da i soni strani vicinu  à Linaglie. In fatti, nimu ùn li avia mai intesi, ma si dicia chì… Si dumandavanu s'è ‘ss’anime innucente eranu intrappulate in ‘ssu locu enigmaticu. Certi credianu chì a nebbia era una maledizzione chì tenia l'anime di i morti in ‘ssu mondu. Ma nimu ùn sapia perchè o cume tuttu què saria accadutu.

Un ghjornu, un stranieru ghjunse in Canari. U so nome era Gabriel è era un cercatore di a verità. Girava u mondu sanu in cerca di risposte. Intrigatu da e storie d’issu paisolu, decise di indagà u misteriu di l'urli di Linaglie. Gabriel era un omu dotatu d’una curiosità lambara è d’una vuluntà irremuvevule di capisce i fenomeni inspiegati.

Cuminciò à interrugà i paisani, racogliendu e so storie è e credenze. E storie ch’ellu sintì eranu piene di tristezza è di dispirazione. L'abitanti cuntavanu una legenda chì certe anime di morti, stavanu custì, senza sapè a  so cundizione, senza alcuna cuscenza di u so destinu tragicu.

Gabriel passava ghjorni è notte à studià a nebbia chì infundava Linaglie, à circà indici per capì a natura d’issi soni strani chì strappavanu l’aria. Mentre e so ricerche, cuminciò à intravede a verità daretu à stu velu di misteru.

Una sera chì u sole s’era tramontatu è chì u paese s’era nimbatu d’una luce d’oru, Gabriel si truvò in l’antica Chjesa Santa Croce chì aggrundava una vechja biblioteca. Truvò un libru polverosu chì cuntava  l'antiche legende di Linaglie. E pagine ingiallite spanticavanu una storia chì fece tremulà à Gabriel in tuttu u so esse.

Secondu a legenda, u paisolu  di Linaglie era statu a scena d’una battaglia sanguinosa parechji seculi fà. I zitelli innucenti eranu stati chjappi in u caosu di a guerra è morsenu tragicamente. E so anime turmentate eranu state intrappulate in a nebbia zeppa chì s’era furmata dopu à a battaglia, tenendu li prigiuneri in un statu di esistenza eterna.

Gabriel capì tandu chì i zitelli di Linaglie eranu i murtuloni d’issi zitelli smarriti. E so ferite chì ùn guarianu mai eranu i segni insquassevuli di a tragedia chì avia culpitu e so vite. A nebbia, intantu, era una barriera invisibile chì i tenia prigiuneri in ‘ssu mondu.

Decisu à liberà i zitelli di Linaglie di u so funestu destinu, Gabriel urganizò un pianu arditu. Riunì i canaresi è li spiegò a so scuperta. Inseme, decisenu di truvà una manera di rompe l'incantu chì mantenia i zitelli prigiuneri.

I mesi chì sequitonu funu pieni di preparazione. I Canaresi principionu à travaglià senza mullà per truvà una manera di squassà a nebbia. Chjamonu à Zia Mariù, una vechja signadora chì certi chjamavanu ancu strega. Era tutta vestuta di negru, cù un nasone granchjutu è una bocca senza denti chì ùn ridia mai. Spessu, i zitelli si ridianu di ella, cantandu li « Zia Mariù hà una coda ! Zia Marù hà una coda ! ». È ghjè cusì chì Zia Mariù divense quasi u diavulu per certi chì si signavanu quandu a vidianu prima di scappà. In veru, Zia Mariù era una passadora d’anime. Inseme studionu rituali antichi è invuconu i spiriti di l'antenati per aiutu.

Infine, ghjunse u ghjornu tantu aspettatu. U paese era immersu in una atmosfera di sulennità è di speranza mischiate. Gabriel, Zia Mariù è i canaresi si raggrupponu tutti davanti à a nebbia densa chì circundava Linaglie. Cumincionu à recità preghere antiche, cantendu canti sacrati è Zia Mariù brusgiò mischji d'erbe magiche mentre cantighjava.

D’un colpu, un ventu putente suffiò da u sprufondu di l’universu, per ore sane, strappendu i veli di nebbia è u paisolu di Linaglie si ritruvò pè a prima volta bagnatu di sole. Dilusi, l'abitanti ùn vidinu solu chè ruine. Ma Zia Mariù, ella, i pudia vede. I zitelli fighjulavanu in giru, maravigliati di vede u mondu oltre a nebbia per a prima volta in a so vita.

S’avvicinò cù un surrisu rassicurante è spiegò a verità nantu à a so cundizione, d’un surrisu chì arrugava a so faccia inguizzita cum'è una vechja mela. Eranu morti, ma i so spiriti eranu stati intrappulati in ‘ssu mondu per via di a tragedia chì avia sbaccaghjatu Linaglie seculi fà. I zitelli ascoltavanu attenti, assorbendu ogni parolla cù una maturità scuncertante.

Cù a liberazione di a nebbia, i zitelli eranu finalmente liberi di andà à cuntinuà u so viaghju à l'oltre. Fighjulonu un'ultima volta  u paese chì era statu a so casa per tantu tempu, po si messenu à marchjà pianu pianu per u caminu luminosu. À l'estremità una luce bianca accecava Zia Mariù è funu assurbiti prestu.

I canaresi si ne stavanu vicini vicini è strinti unu à l’altru, senza capì ciò chì si passava. Sapianu chì qualcosa di magicu era accadutu. Zia Mariù era à tempu sullevata è trista di vede andà si ne ‘ssi zitelli. Ma sapia chì era u megliu per elli, chì meritavanu di truvà a pace in l'aldilà.

Mentre i zitelli s’alluntanavanu, a so forma cuminciò à sguassà si, mischiendu si pocu à pocu in u paisaghju in giru. A so presenza si svania per l’aria, ma avianu lasciatu una stampa stintosa in u core di quelli chì ascultavanu attenti à Zia Mariù cuntà a so storia.

U paisolu di Linaglie avia ritruvatu a so calma, ma ùn saria mai più u listessu. I canaresi avianu amparatu una lezzione preziosa nantu à a vita è a morte, nantu à l'impurtanza di a cumpassione è a cumprensione. Linaglie hè diventatu un simbulu di speranza è di resistenza, un locu induve e storie di i zitelli smarriti sarianu cuntate à e generazioni future.

È cusì, a storia di i zitelli di Linaglie hè stata incisa in a memoria d’issu paesucciu. Eranu diventati legende, esseri chì avianu campatu una esistenza straordinaria malgradu a so cundizione tragica. U so ricordu saria preservatu, un ramentu custantu di a forza di l'amore è di a voluntà umana. L'antica torre quadrata fù risturata in umagiu à ‘ss’anime errante.

Finu à oghje, quandu a nebbia si stende nantu à Linaglie, i canaresi si ricordanu di i zitelli chì tempi fà ci campavanu. A so storia hè tramandata da generazione in generazione, ramintendu à tutti a fragilità di a vita è l'impurtanza di tene caru ogni mumentu.

È in qualchì locu, in un altru mondu, in  un altrò,  i zitelli di Linaglie anu truvatu infine a pace ch’elli meritavanu tantu.

*Issa legenda ùn hè mai esistita chè in a mo imaginazione !