Un messagiu vi invita à vede a vostra guida dinù oghje. Andate puru à u campu di aviazione più vicinu per ritruvà lu. Vi tuccarà à scopre siti archeuastrunomichi di u Nordu di l’isula ch’ellu vi tocca à lacà.

Archeuastrunumia : prisentazione

L’archeuastrunumia hè u studiu di l’implicazione di l’astrunumia ind’è l’antiche culture di u mondu. Issu studiu si pò appughjà nantu à tutte e forme di prove scritte o micca scritte.

Ind’è sta disciplina nova ci vole à osservà ch’ella hè l’astrunumia à piglià a suprana nantu à l’archeulugia (ch’osinnò si parlerebbe piuttostu d’astruarcheologia).

Si sà chì dapoi i tempi più landani tutte e culture umane sottu à tutte e latitudine sò state attente à l’avvenimenti celesti per scopu di cultu, di riti, di urientazione di munimenti funerarii è ancu cun funzione di calendariu.

Dopu à avè scupertu chì u sole è a luna impruntavanu i ritimi di a vita, l’omi anu decisu di venerà cum’è divinità issi dui astri (cun dinò certe volte altre pianete o ancu certe stelle).

Dunque l’archeuastrunumia hè a scenza chì studieghja e relazione trà i munimenti antichi è avvenimenti astrunomichi cum’è i pisà è i ciuttà di u sole o di a luna.

U primu astronomu ch’avessi studiatu i munimenti antichi fù l’Inglese Sir J.N. Lockyer in u 1870. Oghje ci sò centinaie di circatori chì si ritrovanu intornu à issa scenza cù u rigore scentificu à studià e lee trà munimenti antichi è avvenimenti celesti.

Issi munimenti facenu parte di a sfera di u Sacru in u sensu strettu di a parolla.

Da esempii di issi siti pudemu ammintà: i nuraghi sardi, i taulas minurcani, e stantare corse, i dolmens di l’Europa occidentale, obelischi è piramide egizziani, u Panteone di Roma, u trilite di Stonehenge in Inghilterra, e piramide in Messicu o in Perù. Tutti issi siti mettenu in risaltu a listessa necessità cosmica.

Cun l’aiutu di l’astrunumia omu hà capitu l’urientazione di parechji tempii egizziani dedicati à u sole (cum’è quellu di Amon Rà in Karnak alignatu versu à u solstiziu d’estate), ma dinò e direzzione di i munimenti di a Grecia antica (cum’è u Panteone di Atena urientatu versu à u pisà di u sole u ghjornu di u principiu di e feste panatenaiche), a natura di Stonehenge (un tempiu chì tene contu di l’eclipse), l’urientazione di numerosi munimenti preculumbiani chì guardanu punti à l’orizonte chì currispondenu à pisà o ciuttà di u sole à i solstizii o l’equinozii.

Tuttu què ùn hè solu architettura o geugrafia ma dinò religione è credenze magiche in una visione è una cuncezzione di l’Universu.

In l’isule di u Mediterraneu (Baleare, Sardegna è Corsica) parechji munimenti funerarii o in lea incù una cuncezzione di a morte à tempu di u Neuliticu o di l’Età di u Bronzu ci danu un’illustrazione interessante d’urientazione astrunomiche di certi siti. Iss’urientazione ponu ghjuvà à capì i riti funerarii è a religione di i populi di st’isule in issi tempi custì.