Kriváň

L’Alte Tratas sò un monte tozzu chì insegna l’ultimu di l’arcu di L’Alpe. Hè una parte di I Carpati è facenu cum’è una fruntiera naturale trà Pulogna è Sluvacchia. U puntu più altu hè u  Guerlash cù i so 2665 metri, è puru à i slovacchi li piace propiu assai u Kriváň, altu 2494 metri. Di fatti issa punta custindi l’ammentanu unepoche opere artistiche di u paese, hè dinù nant’à a bandera naziunale è po’ hè stata ancu scelta - fate u piacè!- da affaccà si nant’à l’euri slovacchi. Hè cusì ch’ella si spieca chì a spassighjata chì ci porta hè frequentata assai ed hè soli o in famiglia chì turisti è ghjente lucale l’accostanu decisi è primurosi assai. U dislivellu principia à fà si impurtante cù i so più di 1300 metri da attippà in veru. È puru s’è a primura ci hè, hè solu una quistione di tempu è truveremu quassù in cima un zitellucciu d’ondeci anni, fieru fieru d’avè ci la fatta aiutatu  da u babbu. Tandu bellissime storie sò scritte inquant’à isse cullate à l’attippà. Forse cumu quella di a legenda chì conta chì, stancu mortu d’avè supranatu per aria tutte e maraviglie di u paese, un anghjulu intuppò cun l’ala u Kriváň, è cusì li fece a so forma particulare, chì si ricunnosce da luntanu?

 Ritratti

1-Chjassu ch’atteppa in a furesta

2-Si tratta di cullà insù à manca, da salutà u Krivan

3-Un lavu bellucciu à l’inghjò mentre ch’ellu si atteppa

4-Cima à 2494 metri, croce patriarcale è culori di Sluvacchia

5-Paisaghju è volute

6- U krivan hè ammintatu in parechje opere, ci hè nant’à a bandera è l’euri di u paese

7-Dice una legenda chì un anghjulu, intuppendu a so ala, hà datu a so forma à u Krivan