Versione :

La forma di l’anima

Si forma po’ l’anima avè, la forma
di la mèa è un alburu
di predda mura cun una ghjunta
di fogli triniggosi i la lugi udurosa
di lintori, sciolta in un cielu
chi a mangianili
è tantu chjara chi pari si bigghia.

O è in chissi carrucchi
verdi chi cumente certi carri
sottu li diddi mèi allimmiddi,
mòddigghi a l’eva sfàlani
undi a volti l’affutta si sfrabbina
in sciumma tra li scogli,
e zicchirri di piggioni di mari
s’acchjarani i l’azzurra
tegghja, deserta cumente li cori
batìi di pàlpiddi d’amori.

Si forma po’ l’anima avè, la forma
di la mèa è un alburu
accesu i l’incrinadda da una ghjunta
di tèuli a bagginedda, chi figghjulà
pàri li fiari lagni di li veli
e a li volti la nogi bianchisgina
d’una nave in bandu
i l’orizzonti, intantu
chi lampa lu soli un rizzagghju d’oru
e lugi e lu ritira
sfinèndisi darredu a l’Asinara.