Ragiunata
L'alta strada

Lucia : - Quale piglia u caffè ?
Ghjuvan Paulu : - Eiu ùn ne beiu, allora ùn ne portu.
Lucia : - Ùn simu una squatra ? Ci vole à sparte si roba è materiale.
Ghjuvan Paulu : - Hè sicura, ma hè megliu à esse scozzuli.
Lucia : - Eccu lu l'astutu ! Quanti ghjorni mettimu à fà u giru ?
Francesca : - Dimu quindeci ghjorni pè a ghjente abituata à marchjà in muntagna.
Ziu Simone : - Pianu pianu, o zitè, a muntagna hè fatta à scala. Colla è fala.
Ghjuvan Paulu : - Sopra à tuttu l'alta strada. Hè u chjassu più difficile di l'Europa sana.
Ziu Simone : - Più difficile ma più bellu, ne sò sicuru. Mi dispiace di ùn esse più giovanu.
Lucia : - Aiò, o zì, chì tanti giovani è chì tanti vechji ! Site bellu in gamba, andate puru !
Petru Maria : - O zì, da quì à Monte Cintu, quanti chilometri ci hè ?
Lucia : - In muntagna, ùn si conta in chilometri, ma in ore.
Petru Maria : - O Lucì, mi piace u to ghjudiziu ! Cù tè vogliu andà sinu à in punta à l'Annapurna !
Francesca : - Và bè, ma intantu, andemu sinu à u chjassu. L'altri ci aspettanu quallà.
Ghjuvan Paulu : - A` chì ora si parte ?
Lucia : - Subitu. Mi acconciu i scarpi, ficcu u caffè in u saccu di Ghjuvan Paulu è partimu.
Ziu Simone : - Alè, o zitè, salutate mi L'Omu di Cagna...
Francesca : - È l'alti piani cù Bavella...
Ghjuvan Paulu : - A` puntu, Bavella o Bavedda ?
Lucia : - Cum'è tù voli !