Antone : - Simu solu di marzu è spuntanu digià i turisti.
Ziu Simone : - Tuttu cambia. Avà ùn aspettanu più l'estate. Ghjunghjenu di veranu.
Ghjuvan Paulu : - Cù a neve, ne affacca puru di invernu, in Ascu è in Verghju.
Lucia : - È in Ghisoni
Antone : - È in altrò.
Lucia : - Hè megliu cusì. Issi arrivi ci facenu prò.
Antone : - Pè u cumerciu : panatteri, usteriaghji, agenze marittime è aeree, mercanti di ogni roba...
Lucia : - Sò maravigliati. Dicenu : " Chì bellu paese, questu quì ! "
Ziu Simone : - Hè vera. Più belli chè sti lochi, ne cunniscite altri? Feghja què, sta muntagna, sti chjassi, issi pughjali...
Lucia : - Innò, o zì, micca solu questu u paese, ma a Corsica sana. L'isula in generale.
Ghjuvan Paulu : - Un mare sempre turchinu, quelli monti rossi à l'attrachju...
Antone : - Mì mì mì à Ghjuvan Paulu ! O Ghjuvan Pà, ancu tù, avà, ci faci e puesie ?
Lucia : - Lasciate lu parlà. Hà a ragiò ellu. A Corsica hè magnifica.
Vincenzu Mariotti : - È cù i turisti, oramai avete u vostru stantapane.
Antone : - I turisti ùn bastanu, hè u turisimu chì face campà !