Ducumentu
A scalinata di legenda
![Bonifaziu Bonifaziu](https://interromania.com/sites/default/files/styles/image_548xx/public/bonifaziu_12_0.jpg?itok=YOTeX0-n)
Bonifaziu
A Scalinata di u Rè d’Aragone serà trà e cose più stupende in Corsica è ancu in altrò. Ci hè di sicuru a so forma è a so impustatura. Hè propiu una cosa strana issa scalinata cù i so 187 scalini chì frisgianu a rocca in diagunale à falà cù una pendita à 45°. Una volta ch’omu ci lampa un ochju nantu, anderete à spustà u sguardu! Impussibule chì simu affascinati. U sguardu và è vene è ùn a ci face à spiccicà si tantu più chì lumi è culori venenu à ghjucà si trà ciotti è burli di issa muraglia di calcina, tremenda chì hè forte è orrenda chì vi si pare ad ogni seconda chì un ragiu, una vampata, un soffiu di ventu si pò ancu purtà via tuttu.... è lacà solu a legenda.
Issa voce di fola chì conta una notte cum’ella fù zuccata issa scalinata da l’armata di u Rè Aragunese Alfonsu V u Magnanimu in tempi di l’assediu di a cità in u 1420. Andate à sapè…
Anu modu à dì ch’elli sò stati i frati franciscani da pudè andà à piglià l’acqua in a surgente quaiò, propiu duv’elli ghjunghjenu i scalini.