Quand omu pensa à a Corsica affacca subitu u mare turchinu turchinu, a rena bianca è u sole chì luce quassù. In celu. Da perde a bussula senza più sapè duve piglià nè chì chjassu sequità. Ma ùn ci scurdemu chì a piaghja è u mare s’elli si meritanu a so nomina, ùn hà mai fattu male à nimu un bagnu in l’acqua viva di i fiumi o di i lavi, è d’altronde issi lochi custindi ùn mancanu ne di vista nè di paisaghji senza da e parte di Bavedda duve passighjendu spessu si sbocca nantu à vasche naturale o spisce duv’elli frombani i ghjargali. Cum’è pè A Purcaraccia, un fiumicellu di a cumuna di Quenza chì fala da a foce di Bavedda in direzzione di Sulinzara. Un bagnu trà i scogli scaldati da u sole hè propiu una campa !