Versione :

Ragiunata
Corsi di tandu è d'altrò

Parlemu di issi Corsi spatriati tempi fà chì ci ne scurdemu troppu prestu. È purtantu sò elli chì anu fattu cunnosce a Corsica in Francia è per issu mondu. È ne vogliu per prova duie sturiette chì, quale hè chì a sà si elle sò vere o nò ! In Dakar, quellu Senegalese "garcon de cafè" aspettendu chì dui Corsi si decidenu à cumandà qualcosa à beie, si avvicinò dicendu in corsu " È voi chì pigliate ? " In Saigon, un altru Senegalese sbarchendu da u battellu è accoltu da i so cumpatriotti chì li dumandonu si ellu era u solu Senegalese in u battellu. È quellu rispose "J'étais le seul Européen à bord, les autres étaient des Corses et des Bretons".

Ùn burlemu micca troppu chì u sugettu di issi ricordi hè quantunque seriu. È, s'è vo' vulete, parleremu di i Corsi chì stavanu in Marseglia nanzu à a guerra di u trentanove.

Corsi in Marseglia ci ne era tandu, più chè in Aiacciu è in Bastia inseme ! Corsi schietti, purtendu cun elli u muscu di a Corsica. Si tenianu trà di elli cum'è amici, parenti è fratelli. Quandu ne sbuccava unu, ohimè ! Scozzulu scozzulu, per stantà si un buccone l'accuglianu in casa, li davanu l'alloghju è u manghjà è si ellu ùn ci era più lettu per dorme mettianu e strapunte in pianu. Quantu ne hè passatu cusì in Marseglia ! È dopu cù u benistà quantu ci sò chì fecenu nice di scurdà si ne. Aiò, ùn abbiamu russore di cunnosce ciò chì era è s'è no' simu ghjunti à ciò ch'è no' simu, ci vole à ringrazià i nostri antenati "marsegliesi". Cum'ellu dicia quellu prufissore di medicina : "I pastori anu fattu duttori".

Ùn ci era nè telefunu, nè vitture è purtantu tutte e dumeniche si rendianu visita à quandu ind'è l'unu à quandu ind'è l'altru. Passavanu inseme a meza ghjurnata. Prima davanu nutizie di u paese, dopu si ragiunava sopra à tuttu di pulitica, è parechje volte e voce si alzavanu, mentre chì e donne parlavanu di zitelli è affari di donne. È ghjuntu u mumentu di licenzià si eranu sbasgicchimi di e donne è abbracci di l'omi.

Extrait de Ghjuvan battistu Balducchi (1998) À pezzi è à bucconi, Scola corsa di Marseglia