Da ghjunghje in cima à u Monte Cervellu, chì u puntu più altu hè 1624 metri è chì in fatti hè nantu a cumuna di Salice, vicinu vicinu, ci vole à andà in Rusazia, duv’ellu ci hè u puntu da parte pè issa passighjata spurtiva.

A strada da Veru à Rusazia hè splendida. A prima cullata atteppa assai, ma à l’ombra chì si avanza sottu à un’arburatura di pini magnifichi. Una sallita chì offre belli punti di vista nantu à u Cruzini.

Dopu à a costa si sbocca nantu à una bella crestula, Bocca di u Capizzolu, vicinu à i 1000 metri.

Si sequita a crestula una bella stonda è, da stupisce ci hè issu muraglione cuntinuu di panculi à l’à seccu è chì face à u minimu un chilometru! Certe volte hè più altu chè un omu (omancu certi l’omi!) ed hè propiu in bon statu.

D’accordu… ùn sarà a muraglia di China ma ferma quantunque un vede.

Sequitendu l’indicazione si ghjunghje à un angulu d’issa muraglia, si franca è si cuntinueghja u chjassu sin’à una croce maiò da duv’ellu si pò gode un panorama magnificu ver’di Rusazia è i so cuntorni.

Dopu si ghjunghje à u stazzu di Libbiu prima d’intaccà l’ultima cullata ver’di u Cervellu.

È quassù, ripetimu la un’altra volta, a vista hè un veru incantu…

Ci hè in particulare una vista eccezziunale nantu à u monte Trè Torre chì dice bè ciò ch’ellu dice u nome in corsu: trè torre!

E trè cime chì facenu issu monte, da u monte Cervellu si vede propiu bè cum’elle si staccanu una da l’altra. Una culunia di ciriole anu fattu u so alloghju quassù, nantu i scogli più alti. Sarà qualchì appuntamentu da ripruduce si, à ciò chì pare. In certi punti i scogli eranu rossi da l’insetti nantu!.

Per rifalà inghjò, si volta ver’di u stazzu, è po dopu si pò andà longu à u fiuminale è si casca nantu à una pista (marcata nantu a carta IGN) è cusì si face un giru sanu. A pista porta à u paese, ma ci hà da vulè à francà parechji cateri, è curà ch’omu l’hà chjosi bè, dopu passatu ci!