Una bedda spassighjata cù a particularità d’offra tanti punti di vista è tanti dicori.

Si franca u matrali di Todda è s’ellu ci hè un veiculu da tutti tarreni si pò cuddà sinu à a foci duv’elli sò i cistarni. S’ella hè cusì, priveda à pena più tempu.

A cuddata hè dighjà una campa. À pocu à pocu si palesa u panorama nantu à u paesi di Todda.

Più si codda è più si spechja nant’à l’acqua di u matrali.

Da a foci si ghjunghji à un picculu chjassu chì gira è rigira in un sottuboscu, è quindi è custindi apri dui punti di vista nantu à u matrali. Prestu, simu nantu à una piccula foci bedda sgagiata chì ci porghji un panorama splendidu nantu à a vaddi di u Prunelli sin’ad Aiacciu.

Cuntinuendu à pedi à nantu à issu chjassu si pò tuccà parechji cimi è trà quissi a Punta di a Gattaghja à 855 metri d’altura. Ognuna offri un puntu di vista sfarenti. È quidda più luntana è duv’ellu smarrisce u chjassu stà propiu sopra à u matrali.