Un locu ch’ùn si pò mancà s’omu vole scopre issa Corsica più salvatica chè mai

U lavu a Crena in Corsica hè in u rughjone di i Dui Sorri sopra à i paesi d’Ortu è di A Soccia. Ci si pò ghjunghje da issi dui paesi. Situatu à 1310 metri d’altura, ùn ci si pò ghjunghje chè dopu à un’ora è mezu di marchja pè i chjassi mulatteri.

Hè u lavu ghjacciale più chjucu di Corsica ma u solu chì fussi inturniatu da pini larici.

I nenufari ci danu un spettaculu abbagliulante è e bellule ci facenu un ballu squisitu da fà ci stà muti di rispettu, vistu ciò ch’ella ci rigala in issu locu a Signora Natura. Hè una passighjata faciule è famigliale chì permette d’immurtalizà ciò chì a natura corsa pò offre à chì a visita cun riverenza è cunsiderazione.