Sos pantasimas essin dae sas tuppas

Inuve su pratu
imbenit sa carchera
s’abba rughiat

trona-trona

dae sa rocca ‘e s’astore

abba cantata
sutta bancales de ruvu.

Una die semus intratos
in s’iscuruluchente
illonghiatos contra a sos pontes
in s’ora imbreaca.
Poi no’ semus istatos
ateru che pantasimas
puppas
marias pettènas
surviles
mammotis
crapas a muilu
babbarrozzis

frichinatos
pro su tophet.

A su torrare ‘e sas carenas

amur vitu abba luvata
abba de lanedda ‘e monte
abba ‘e neulache
abba chene ammentu ‘e temporatas
e de terras sarvas.

A su baal non nche ana ghettatu
a su sonnu de sos malinconios
a sos calmantes comente preghiera de cata die.
Prus no’ semus esistitos
issocatos
caminaiamus in s’assenzio
imbrecaos de uffratura
voes ammasetatos
in su lumenagliu
de su nostru
istare
arraichinatos
a sa luche.