S’aghera er galu de nive

Alma mater

terra
mela melagranata

atta a mesu luna
in custu sero de Sant’Andria
Chi non benit bene a precare.
Su Deus chi aimus creitu
izzu ostru izzu nostru

s’est aumbratu
affumatu
in bucca ‘e ziminea
braia mori mori
a sonos de caminata lepia.

So’ ispiritos
nche uran sos pizzinnos
nche los pican

intro de sa bertula

canno sa ninna nanna
sonat caddos de calentura

pro sos izzos
secatos de creschere.

Isteddos minores
ripitin paraulas rebeldes
guttiu iffatu a guttiu
abbas iscuruluchentes
dier malas
pro nois ispintos
a intro de s’urru.

Che pane amus cottu
chene pesare

canzellatos
dae sa lista de so’ sarvatos
nois chin su tremene
semprer manente.

Ischintiddas

in su buitu de sa erula
dissipan
custos muros

domo de carvone

cossumitu.

S’aghera er galu de nive.
Sos palumbos
volana bassos.