Alanu DI MEGLIO, presidente di a Ghjuria CORSICA

rimarca ch'elle si assignaleghjanu scritture ghjovane è feminile 

Cuncorsu di prosa 2000 : una fragnata à u feminili

     Si hè adunita a ghjuria di a Biennali di prosa literaria 2000 di u CCU. à participacci quist’annu sò stati una quindicina di testi.
Com’è sempri a scelta hè sempri u mumentu à tempu dulenti da fà sbuccà cinqui participianti è piacevuli chì parmetti di staccà u pocu è tantu di criterii da dà un sensu à a primiata.
     Và sicondu l’anni u gennaru di testi ricivutu. Essendu u cuncursu di prosa à tema libaru, u solu criteriu di principiu chì possa valè hè u piacè ch’iddu pidda u littori. Ma quandu s’intoppani al di là di cinqui nantu à issu stessu criteriu, tocca à fà una scelta chì arreca parametri di più.

     S’infatta chì quist’annu si sò à l’ingrossu spartutu dui gruppi : unu chì a so scrittura era cunfirmata ma chì praticava temi è spazii literarii dighjà belli rumati da i generazioni di nanzi è l’altru chì, puri cù uni pochi di sgarbatezzi di lingua è di custruzzioni, musciava una literatura più nova, cù un abbriu di scuparta è di creatività à liveddu di a finzioni è di l’architettura di u racontu.

     Da più à menu, hè a squadra di Bonanova chì faci da ghjuria. Hè cusì chì, sicondu a cerca literaria è l’indiatura di a rivista, i primiati di quist’annu sò stati scelti di più nantu à u criteriu di una literatura in duvintà. Si hè incalcatu tandu versu i virtù putinziali più chè nantu à scritturi insulcati è sicuri ma chì ùn ghjunghjini quantunqua micca à pidda qualchì risicu in quantu à vii novi di creatività.
     Dunqua, fora di Anghjulu Canarelli, primu premiu chì hè d’un pezzu ch’iddu introscia a pinna in i fiumi di l’Alta Rocca, sò quattru altri scrivani ch’è no’ scuprimu inde l’aghja di a literatura corsa. Si trova ch’iddi sò quattru donni è ci hè da rallegrassini. Sò :

• Maria Anghjula Mazzoni, ghjovana certificata di corsu,
• Mattea Casanova, stututrici,
• Carina Venturini, studianti in terzu ciculu.
• Maria Natali Vivarelli, prufissori di i scoli

    Ch’idda doghi issa fragnata 2000 monda inchjostru da arricacci torna robba di qualità.