Eo so tèssida
de ruju
ruju istrazzadu
de sa chintorza rujastra
surzìda de suores 'e capidanni
de tottu sas messeras

Eo So tèssida
de birde
birde de unu muccaloru birde pallidu
istrintu a su tuju subra sas semidas de faina
de tottu sos bestires mios plebeos

Eo so tèssida
de biaittu
biaittu de antedda iscolorida
cosida e acconzada dae manu istroppiada
ispòrta de fadiga isfinida
de tottu sas regoltas

Eo so tèssida
de nieddu
nieddu de istrazzinas nieddas
addoloradas dae sos affannos doppios
de tottu sas agonias

Eo so tèssida
de grogu
grogu de sa camijetta ingroghida
consumada dae s'innamorada attrivida
in momentos de amore a su limite
de tottu su godimentu

Eo so tèssida
de biancu
biancu de sos pannos imbiancados
biancore de camice in manos de majarzas
incunzadoras mudas de chimeras
de tottu sas semenaduras