Antoni ARCA scrittore, pedagogu, animatore culturale

Currispundente è amicu di sempre, Antoni ARCA hà fattu una longa strada cù u nostru associu in varie cuuperazione literarie, teatrale ed educative. A piccula ragiunata d'oghje ci porghje u so parè in quantu à i linguaghji è strumenti chì e tecnulugie nove offrenu à l'estru di u scrittore. Una fidighjata nantu à e pussibilità tamante di l'e-book scopre un orizonte propiu demultiplicatore di primura pè e piccule literature. Ma arrimbà si à a nuvità ùn vole dì squassà e vie tradiziunale di a spressione: una passata cunsacrata à "Uralità è scrittura" a dice in modu chjaru.

A cullaburazione cù Antoni hà permessu parechje creazione teatrale, in particulare U Medicu stranieru à a fine di l'anni 1990.Issa storia di un giovanu duttore ghjudeiu chì ùn pò salvà una giovana catolica è sarà cundannatu à morte ci rimanda à l'epica di a pudenza aragunese ma dinù à a mudernità. Mariano CORDA di Cagliari ci fece cusì bella cumpusizione d'attore à tempu à a truppa di U TEATRINU!

L'ultima parte di l'intervista ammenta u postu predilettu di u teatru à tempu per l'educazione suciale, a spressione di a persunalità è u valore di ricuperu di a lingua materna in u sviluppu educativu.

Antoni ARCA (Alghero 1956) hè prufessore da l’anni 1980. Si hè sempre arrimbatu à issa sperienza è primura cuncreta di l’insignamentu è a trasmissione ancu tucchendu ad altri livelli d’insignamentu cum’è in particulare ind’è l’ambiente universitariu. Custindi, hà insignatu a suciulugia è a literatura pè a zitellina dapoi u 1980 è da l’anni 2000 si cuncentra nantu à l’amparera di a lingua è literatura catalana.Sò più di trenta anni ch’ellu publicheghja libri in e trè lingue chì li sò culturalamente è geugraficamente vicine: italianu, sardu, catalanu. Durante parechji anni si hè occupatu di traduzzione, assaghji, puesia, teatru è raconti da a parte infantile è pè i zitelli. È po à pocu à pocu hà sceltu di cappià a cullaburazione cun riviste, giurnali è istituzioni accademiche per dedicà si tuttu à a creazione narrativa “a chilometro zero”.

Basta un clic nantu à a tastera è issa scrittura “a chilometro zero” hè persunale è publica.

U so ultimu rumanzu publicatu ind’è l’editore Nor di Ghilarza (Annie Stevens in a versione algherese è Annie’s Island in quella taliana) hè digià ammanitu in u mondu sanu, è ùn hà nè frazatu una goccia di essensa nè lampatu un solu arburu!

Da nutà trà tante opere di soiu:
Fabulas, Interlinea, Novara 2005.
Animazione alla lettura, La Scuola, Brescia 2006 
Racconti di Nino, Condaghes, Casteddu 2007
Benidores, Condaghes, Casteddu 2008.
Duty Free, Fonoll, Juneda 2010.
Annie’s Island, Nor, Ilartzi 2015.