Tania Kassis, diplumata di u Cunservatoriu di Parigi, rimarcata è unurata cù a Medaglia di u Meritu Libanese scumbatte à prò di a diversità di e culture è u barattu trà religione. A so voce d’incantu cù un versu cantarinu sputicu soiu è uriginale assai a si hà fatta valè in tanti paesi : Francia, America di Nordu à Sudu è Curea suttana. In Seul, duv’ella buscò un veru trionfu chì l’hà purtata à esse numinata imbasciatrice unuraria di u Cuntingente sudcureanu di e Forze Interim di e Nazione Unite. È po ci hè, bella sicura, a so nomina in u so paese di nascita, u Libanu. In New-York è po in Parigi à l’UNESCO, hà fattu umagiu à u pueta Gibran Khalil Gibran. U successu tamantu ch’ella si gode hè tissutu trà talentu è mistieru di cantatrice aggarbata, elegante è squisita. Ma pè assai ci hè dinù a scelta soia di un itinerariu artisticu arditu è è prufondu: u chjama è rispondi trà fede è culture di solitu pensate è vissute cumu s’elle fussinu non solu spiccate, ma nimiche è cundannate à fà si a guerra. À chì stà à sente u so AVE islamucristianu a risente, a sente subitu subitu .

A so strada artistica hè di quelle più alluminate, sciaccamanata da e persunalità più alte di varie di stati è nazione è impuntellate da atti pulitichi simbolichi chì dicenu tantu… Basterà à ammintà u so cuncertu -cun 200000 persone è più- in Piazza di i Martiri in Beyrouth. È dinù issa dumanda di u papa Benedettu XVI chì cherse à u Primu Ministru Saad Hariri una copia di l’AVE islamucristianu.