A tradizione di Sant'Andria in Corsica ricolla à un'usu anticu celebratu u 30 di nuvembre. Issa festa marca a transizione trà u vaghjime è l'invernu è a fine di a cugliera. Incuragisce a sulidarità è l'aiutu mutuale versu i più poveri.

 

A festa principia cù un gruppu di zitelli, guidati da più maiò, chì cantanu a filastrocca chjamata « a pricantula », accumpagnati da unu chì porta un saccu. A ghjente di e case visitate offre à i zitelli frutti secchi è dolci, simbulizendu a spartera è a generusità.

 

« Aprite ! Aprite ! Aprite à sant’Andria chì vene da longa via

Hà i pedi cunghjalati, hà bisognu di riscaldà si

d’un bon’ bichjeru di vinu è di qualchì biscuttini !

Andate  à a casetta,

Pigliate l’uva secca !

Andate à u cascittellu,

Pigliate u canistrellu !

Andtae à u cascittone,

Pigliate u canistrone !

Aprite ! Aprite ! Aprite chì ghjè Sant’Andria !»

 

I zitelli, vestuti di stracci scuri è e so facce pinte di negru cù u carbone, trascinanu stagnoni è cazzarole liati cù a corda, rammintendu un tempu più anzianu. Certi piattanu e so facce cù sciarpe negre è e campane di i pastori ponu esse intese per ricurdà l'agropasturalismu di l'antichi.

 

A prucessiò di i zitelli si finisce in piazza di a chjesa, duv’elli si ritrovanu per sparte l’offerte raccolte per u so parcorsu. A tradizione di Sant'Andria hè cusì arradicata à a sulidarità è à l'aiutu mutuale, festighjendu u passaghju di e stagioni è a tradizione di dà à i menu furtunati à a fine di u vaghjime. Issa festa hè un mischju di riti antichi, di generusità è di festa, priservendu cusì u ligame trà a cumunità è i valori di spartera.

 

Sant’Andria apre e porte di l’invernu è Santa Lucia e spallanca…

 

« Aprite ! Aprite ! Aprite !

À Sant’Andria !

Spartite ! Spartite !

È cusì sia !

Noce è frutti,

À noi tutti !

Aprite ! Spartite !

Hè Sant’Andria ! »