S'urtimu contu
In bidda b'aiat duos istradones. Su 'e tres it che' canno non b'esseret istatu. Non bi colaiat su postale 'e sa Sita, nen caddos, nen carros, nemancu gamas de erveches turvanne. Petzi carchi èmina l'imbucaiat annanne a abare s'orteddu, o unu tziu vetzu a cumbutare. Ite poi? Nachi nch'arreghiat in pedes dei cuddu bete muraglione de sos Montes Arvos. Ateru, nois minores, non ischìamus. Su nùmene de istradone l'it vintzas tropu, e dae cussu li naraian "sa caminera 'e josso", e tantu l'it bastante.