Alcudina faci « incudine » in cismuntincu è « enclume «  in francesu”. Culmineghja à 2134 metri ed hè l’ultima alta crestula à sudu di a sarra di i muntagni isulani. Si trova trà u pianu di U Cuscionu è i Punti di Bavedda in Pumonti.

Si parta da i stazzi di Matalza. U chjassu chì ghjunghji nantu à a crestula franca un fiumiceddu (Attenti chì, second’à l’epica di l’annu, u fiumiceddu pò in furia duvintà un fiumi).

I marchi nantu à i scoddi insegnanu u caminu è dopu sò nantu à l’arburi, issi marchi! Tandu si pò attippà ver’di a foci di Luana. Hè magnifica a vista nantu à u pianu. Sinu à duv’idda porta a vista, ùn ci hè un fiatu! È puru in issi lochi ci stanu l’aceddi, i mufri, i vulpi è tanti altri... animalotti tamanti.

Ghjustu à solu 500 metri da a cima, u cotru (chì ci ni pò essa sempri) faci sculiscià di più in più. Ci voli à avè l’arnesi à posta da pudè ghjunghja sinu à u puntu più altu..

A spassighjata spurtiva hè, ma dinò piacevuli, par via chì sò varii i paisaghji è da a cima, u puntu di vista apri un panoramà beddu chì ùn si pò dì.