PAULA 1

 

 

     In un paisolu miseriosu u dottore s'accogge, visitendu una malata, ch'ella hè maschjufemina.

A famiglia ùn avia mai palisatu issa tara, fendu campà a poveraccia in donna, per forza.

A so vita sana, Paula, cusì si chjamava, a s'avia passata in a pelle d'una femina allora chì u so naturale a portava à esse piuttostu un omacale.

 

Paula hè in camera incù u dottore è a mamma. Ghjè quasi scimita vistu chì u so secretu hè avventatu .

A mamma chjama tandu u babbu sottu à a casa, li chere d'andà à circà u prete pà provà di salvà la, pensendu chi solu Diu o unu di i so riprisentanti pò cambià a situazione.

 

Paula (pienghje in un scolu  di lacrime)

-O mà, mi ne vogliu more, bramu sparìsce di sta terra pè u sempre, fà vene u bancalaru à piglià e misure di a cascia, ùn poderaghju mai più campà à cristianinu avà chì l'abitanti anu da esse à u corrente di a mo vergogna ! U dottore paliserà e feste, ne sò sicura, ùn esiste micca u secretu prufessiunale è dumane a saperanu ancu e ghjalline !

 

A mamma (incrispita )

-O vai o scemò, ùn parlà di morte, lascia cantà à chì canta è noi ripiglieremu a nostra vita cum'è s'ellu ùn c'era statu nunda ! Si n'hè vistu d'altre in sti lochi, iè, altri miraculi face u tonu !

 

Paula

- Ùn vogliu micca chì stu dottoracciu mi metti a manu adossu, aghju più paura di i medichi chè di e malatie, a sai dipoi u tempu, pare ch’è tù mi scopre oghje !

 

U dottore  (implorante)

- Madama, lasciate vi fà, accettate sta piccatura, a sola chì vi pò sullevà à penuccia, è dopu chjameremu i pompieri per portà vi à l'ospidale.

 

Paula  (si voltuleghja in u lettu)

-À l'ospidale, à l'ospidale ! Ùn ci sò mancu andata per nasce chì mamma hà parturitu in u stazzile, sorpresa di vede mi ghjungne mentre ch'ella curava i zichini ! Ié, a m'hà conta, i staccava ch'elli ùn sughjinu più per spachjà li.

 

U dottore  (Mughjendu)

-O madama, a vostra figliola face perde a pazienza ancu à i santi, à momenti mi ne vò chì n'aghju una techja cum'è di carne fracica !

 

A mamma (Mettendu si à ghjinochje)

-O sgiò dottore, appiete pietà di sta meschinella, perde u capu, fighjate la, suda quant'è Cristu in l'Ortu ! Aghju paura ch'ella ci ghjochi l'anca à forza d'aspettà !

 

U dottore (inzergatu )

-Sapite madama, parlendu di l'anca, mi vene a voglia di serve mi di a meia per dà li un calciu in culu à a vostra…o u vostru…chì ne sò…infine à sta criatura d'infernu nata in una chjostra.

 

Affacca u babbu, fucile in manu, a bavacciula chì li fala sin'à u pettu.

 

U babbu

-Nimu ùn esce di sta stanza si a mo figliola hà bisognu d'esse accurata !

Voi dottore di i mo stifali, fate mi sta piccatura in quatr'è trè sette, à mè a mo figliola mi teme ! A prova, sò eiu ch'aghju impeditu di fà sapè à nimu ch'ella ùn era normale !

 

(Piu và è piu Paula strida, l'oghji   sburlati è a cera bianca d'una morta.)

 

U babbu

Cristacciu, eiu ùn credu nè in u signore nè in a madonna, ci sò di quelli più maligni chè voi falati secchi per isse muntagne !

 

U dottore (pienghjendu)

 - O chì vitaccia, ma cosa facciu in stu paese d'abbastarditi ? Mì à custì, què u vechju hè prontu à tombà mi sò ùn ci la ghjungu à ammaestrà stu mostru di natura !

Ùn ci metteraghju mai più i pedi in sta cumuna di merda, poderanu puru fà mi circà, risponderaghju cum'è quellu chì dicia "Torna à Vignale ch'hè un bellu paese" ! U figliolu  di mamma ùn lu vederanu mai più in sti locacci, ch'ellu mi fali a saetta s’o ci rivengu !!!!

 

Cathy Campana