In e messe à ghjornu precedente (31.08.2017 è 15.09.2017) avemu insignatu l’idea è i principii chì vulianu dà puntellu è voce assicurata à a mossa detta di u “RIACQUISTU”. Trà issi puntelli chì cuntavanu di esse l'ampiificatori d’issa voce militante, RIGIRU ci avia un postu è una funzione prediletta: avemu fattu una fidighjata nantu à a struttura è u bilanciu di issa rivista. Dui altri puntelli sò da ammintà: I.2.A CHJAMATA, I.3.PAROLI SCIOLTI

I.2.A CHJAMATA,

Organu di diffusione di l’ideetrà mezu à i socii di “A CASA DI U POPULU CORSU”, cuuperativa di i Corsi in a regione parigina, issu mediu trapassa i limiti d’issu generu di publicazione.Durante dui anni (da ferraghju di u 1979 à aprile di u 1981), cuntribuisce à arricchì pensà è riflessione nantu à a cultura corsa, è à tempu dà di manu à a pruduzzione. A leia più stretta cun l’azzione è u cuntestu puliticu (attività parechje, attualità di i prucessi pulitichi di a Corte di Securità in Parigi), una paruzione più regulare, una squatra redazziunale (duv’ellu si ritrova d’altronde i socii “parigini” di a redazzione di Rigiru), più larga è più ammanita, una facitura di messa in pagina chì garba di più,danu à A Chjamata un versu più presente chè Rigiru.E rubriche sò più numerose è più varie chè ind’è Rigiru., più vicine à l’attualità di a Corsica à traversu i penseri è primure di “A CASA DI U POPULU CORSU”.Articuli è riflessione inquantu à e literature, a corsa è altre, vanu di paru cù e cronache di l’associu, i contiresi di l’attività di i Corsi “esiliati”, ghjochi varii è sosule di pasti nustrali.Hè apertu largu largu u giurnale à u cumentu è a critica di l’avvenimenti è e strutture pulitiche. Analisi è dibattitu si facenu per mezu di cumunicati è nutizie satiriche, libelli è epigrama rimati in versi tradiziunali è dinù cù u disegnu satiricu ed umuristicu.

E quistione tocche è scavate da A Chjamata sò tutte quelle di u populu corsu di pettu à e vicende oghjinche di a so vita:

• Riflessione pulitica di prima, cun l’affirmazione di i diritti naziunali di u populu corsu à u lume di a DICHJARAZIONE UNIVERSALI DI I DIRITTI DI I POPULI (cf.u n°5: “L’omini sò populi”); l’analisi s’attualizeghja ammintendu l’alienazione è u svegliu indispensevule (cf.u n°7 “A cuscentizazione”) è a critica di e forze di pudere chì venenu à falsificà a storia (cf.n°4 “U Disingannu”) appughjate da tutti quelli chì a si facenu cù “a forza, a pudenza, u dinaru” (“Biancu o neru” in u n°3). A critica si porta nantu à “u corpu sciali francesu” sanu sanu duv’elle si ficcate è sò stabilite e forze disumane: a prova si ne hè  data ind’è “Avà par dumani”, critica di l’accunsentu razzistu à prupositu di l’attentatu di u carrughju Copernica in Parigi (cf.n°6): Dunque, “Difendendu i sfarenzi di l’altri, difendimu i nostri è viciversa”.
• Issu pensamentu puliticu chì porta sumenta di risistenza è rivuluzione si arremba nantu à una visione culturale di a quistione corsa “a so pudenza interna”, una “forza vitali tamanta” (cf.n°4, “U disingannu”. Quessa hè sempre oghjincata, attualizata in a storia di u sintimu naziunale è chì definisce u corsu da elementu di una cumunutà (cf.n°1, “Insemu”), “Unavoci cumuna” (cf.n°2) ch’elli spechjanu i Corsi di fora megliu forse di quelli in l’isula (cf.n°3).
• U postu di l’intelettuale è a literatura:
• Si capisce chì tanduùn sò micca pensate, risentuti è spressi cum’è ind’è Rigiru, per indettu. A sfarenza si face inquantu à a quistione di l’indiatura di a robba literaria. Spressivu, chjaru è nettu assai hè l’articulettu di u n°6 nantu à J.P.Sartre duv’ellu scrive Petru Giamarchi:

• “... chì lezzione per l’intellettuali papachjoni...”
• “ Flaubert et Goncourt sò pè qualcosa in a repressione dopu à a Cumuna di Parigi perchè si sò stati zitti...” (Situations)
• “Chì ghjè a scrittura s’è u scrittore si stà in a so stanza, chì ghjè l’arte à cantu à e suffrenza di l’omu, chì ghjè l’omu quandu i populi sò incatenati?...”

I.3.PAROLI SCIOLTI

In fatti per sopra à l’uppusizione di sensibilità è di duttrina si leghje u scalu trà a funzione altissima (voce, locu, strumentu d’esistenza è di resistenza) assignata à a literatura è a cundizione vera ch’ellu li si face in a realità. Di fatti si rimarca chì a literatura di u 1970 ferma una literatura di rivista cun l’incunvenienti ligati cun issu modu di diffusione: dimensione strette, irregularità, marginalizazione, udienza limitata è/o spezializata.a

Da mette in ballu e cundizione di un’altru postu di più in cunsunanza cù a vita cutidiana si era pruvata un’andatura uriginale.In u 1978, corre di ferraghju un affissettu redattu da Rinatu Coti à nome di un’impresa nova: PAROLI SCIOLTI. E primure è i scopi sò questi quì:

• Mette inseme scritti digià publicatima difficiuli da truvà si, o altri nancu stampati è quelli chì saranu stampati, per mezu di e pruspettive offerte à puntu da PAROLI SCIOLTI.
• Mette in pede e cundizione di a creazione futura di una casa d’edizione è di canali di diffusone franchi ed indipendenti da u circuitu suldaghju è da u monopoliu mediaticu di tutti i giurnali.
• Creà modi novi di baratti, da sparghje pè u più in i paesi è rughjoni, cù a cullaburazione di e “Case cumune” è di l’associi, un muvimentu assai attivu ind’è l’anni di u riacquistu settantescu.
• Allargà u più chì si pò a nuzione di “cultura”, è lacà corre e definizione strette di a literatura cum’è quella di “alta cultura”. Issa via custindi permette d’inserisce in a literatura ancu a cusidetta “literatura à bocca”, cù una dignità sana è piena.
• Pè a scelta, duie cundizione: sputichezza è qualità.

Cum’ella accade spessu isse idee generose sò state illustrate pocu pocu. PAROLI SCIOLTI annunziava 6 numeri à l’annu. Ùn si ne cuntò chè 2 à l’epica studiata, ma duie opere maiò è chì ebbenu bellu ribombu: Intornu à l’essezza di R.Coti è A cunfina di Saveriu Valentini. (nantu à issi dui libraccioli è Paroli Sciolti, si veca à Rigiru n°14 è Kyrn (maghju  1978 è marzu 1979).

Cun PAROLI SCIOLTI  era statu fattu vede è iniziatu un bellu sforzu pè a presentazione è a circulazione di l’opere, ma cumu si saria pussutu truvà sboccu subitu, in e cundizione generale duv’ellu affaccava un prugrama libertariu à mezu à cundizione generale di dispressu officiale, di varii fatti d’alienazione ingravata da a disertificazione di i rughjoni. Un prugrama simule chì pussibilità ci era di fà lu cuntinuu?