E LENTICHJE FARZITE

 

In u paese di Pancheraccia ci eranu parechje fole. Una sera in caffè ghjunse Paul Battini à cuntà ci e so storie

« Tempu di guerra ». Dicia ellu… « Ci era un omu, Luigi Spella chì patia a fame, è s’era inventatu parechje sosule. A cuniscite a sosula di e lentichje farzite !? »

Un zitellu à mez’à u caffè disse :

-« innò ! »

è Battini di risponde :

-« Peccatu sò propiu bone »

cù una regna ind’è u so mustacciu. U zitellu si sclamò :

-« Ma o Zì cumu s’approntanu què ? Stranu chì Mammò ùn l’appia mai fatte… »

È u vechju malignone Paul ripigliò in più bella :

-« Ghjè simplice simplice, piglia a lentichja, a sbaffa in dui è l’empii di farza ! Sai ch’avemu da fà ? Dumenica, vengu à manghjà è t’appruntemu sta sosula cù Mammò ».

U zitellu tuttu felice ùn aspettava chè a dumenica. Ghjunse u ghjornu, u zitellu era à tavulinu à 11 ore è mezu. Ciccunò meziornu, è Mammò disse à u so figliulinu :

-« Ma ch’aspetterai cusì tutt’essittatu ? »

-« Ci hè Ziu Paul, ch’hà da cullà per appruntà e lentichje farzite ! »

Mammò si misse à schiattà di risa dicendu :

-« O u mio coccu, voli ch’è no mettissimu a farza nentr’à e lentichje cusì chjuche ? »

U zitellu inghjuliatu, si rese contu ch’ellu s’era fattu intrappulà…

 

Ghjuvan’Antò  Baronti LCC2