SALTA IN U ME SACCU

 

Tocc’à iss’alturi di Niolu, un povar’omu chjamatu Franciscolu campaia in un paisolu incù i so dodici figlioli.

Battiani a fami nera, è Franciscolu ùn a di facia più à dà à manghjà à tamanta famiglia! Allora, à crepacori, dumandὸ à i so figlioli d’andà si ni tutti pà issu mondu, incù a speranza ch’eddi truvessini travagliu è pani, è vita menu mischina.

 

Tutti funu d’accunsentu, ma Brancaziu, u più chjucu di i figlioli, chì era sciancu di nascita pà via d’una ghjamba torta, era addispiratu :

-« O bà, comu faraghju pà guadagnà u me pani, ch’ùn possu mancu fà un O di canna!

-« Ùn ti tribulà, u me figliolu, chì tutt’i to frateddi ùn ti lacaranu mora di fami. Va’ puru incù eddi, scuciuratu. »

 

U lindumani à ù fà di u ghjornu, si mettini tutt’in viaghju, ghjurendu di stà uniti in tutt’i casi, è ugnunu dopu l’altru pigliaiani à Brancaziu nant’à i spaddi. Ma à u capu di qualchì ghjorni, u ziteddu era divintatu un castigu, è i so fratiddacci ani dicisu d’abbandunà lu pà strada, è ch’eddu si sbrogli com’eddu pudia.

 

Ghjunsini cusì in Bonifaziù, incù a furtuna di truvà un battellu pà purta li di rigalu in Sardegna, chì culà, a vita saria menu miseriosa. Ma passatu i Bocchi di Bonifaziu, una timpesta mai più vista s’hè pisata, è u battellu persi veli è maghju, purtendu in fondu di mari robba è ghjenti! Eccu a ricumpenza di l’ondici di fratiddacci, tutti morti in listessu tempu!.

 

Ѐ Brancaziu, à chì n’hè? Eddu s’hè fermu induva l’ani lacatu, è s’hè addurmintatu stancu mortu.

 

Anghjulina, a Fata d’issu locu chì avia vistu tuttu, presa di cumpassioni pà issu povaru ziteddu, allora ch’edd’era inzuchittatu, li tocca a ghjamba malata incù a so mazzetta incantata è eccu lu varitu di colpu!

 Si sveghja è vedi issa vichjuledda incù un carcu di legni nant’à i spaddi, chì ridia di cuntintezza.

-« Arrizza ti è marchja, chì t’aghju varitu incù certi arbigliuli biniditi ch’e cunnoscu! « 

-« Ch’è vo campi i cent’anni, o Madama , chì mi salveti a vita! Viniti ch’e vi basgi. Deti mi u vostru carcu di legni, ch’e u vi purtaraghju »

 

Brancaziu si volta pà basgià la, è miraculu! Ùn vedi più una vichjuledda ma una bedda zitiddetta bionda, vistuta comu una principessa, carca d’oru è di diamanti!

Hà capitu tandu ch’Anghjulina era una Fata chì u vulia bè!

-« Vecu ch’è tù ùn sè micca un ingratu è ti vogliù bè. Allora, prima di parta, dì mi dui cosi ch’è tù vularii, è i ti daraghju incù piaceri.

-« Prima, vulariu un saccu pà metta drentu ciò ch’e vogliu, quand’e vogliu, è po dinò un bastonu capaci di fà ciò ch’e li dumandu.

 

Anghjulina sparisci di colpu, è Brancaziu si trova inc’un saccu è un bastonu à i so pedi!

-« Pruvemu ghjà sì i me dumandi sò stati accittati : Vogliu ch’un pullastru arrustitu entri in u me saccu!»

 

À u mumentu fù fattu! Allora Brancaziu dumanda pani è cumpani, vinu di qualità è tuttu pà fà un pranzu maravigliosu!

 

Dopu una bedda sunnata, si metti in viaghju è ghjunsi da i parti di Figari, un paisolu à bordu di mari, induva si pudia scuntrà tutt’i più gran’ ghjucadori di carti di a Corsica! Ma pà ghjucà, ci volini soldi in quantità!

 

-« Centumila scudi in u me saccu in pezzi d’oru, è dopu andaraghju anch’eiu à ghjucà à carti, cosa ch’ùn aghju mai fattu!» : basta à cumandà, è u saccu hè pienu!!

 

Bisogn’à sapè ch’in Figari vinia vulinteri u diavuli, è pigliendu a forma di un beddu ghjuvanottu, ghjucava à carti è spiumava tutti l’altri ghjucadori. Ė dopu, cumprava i so animi è li facia fà tanti purcarii.

 

In Figari, s’hè sapiutu ch’edd’era ghjuntu un zitiddettu carcu di soldi, Brancaziu benintesu, u dicianu i principi di San Francescu, chì vulia ghjuca à carti. U diavuli andeti à veda lu pà prupona di fà una partita di carti à l’Ustaria di u paesi.

 

Si detini appuntamentu pà sta notti, ma u diavuli hà lacatu veda i so pedi di beccu, è Franciscolu hà capitu subitu qual’edd’era :

 

-« Ò!Ò!Ò!! u diavuli in parsona chì veni à veda mi!. Amusemu ci un pocu », si dissi ridendu!

 

Ѐ a sera, si prisintὸ à l’ustaria. Quì impara chì un ghjuvanottu s’era tombu dopu avè tuttu persu à carti. Solu u diavuli in un cantu ridia à l’appiattu. Benintesu, era eddu chì li avia presu tutt’i so soldi!

 

Dopu l’intarru d’issu ghjovanu, tutti si mettini à ghjucà, ma Brancaziu ùn era bonu è hà persu a so furtuna. Allora u diavuli li dissi :

-« Vi possu fà guadagnà tuttu ciò chè aveti persu, ma ci vularà à fà un malfattu.Vi dumandaraghju d’andà à strangulà una vichjetta, o qualcosa cusì.. »

 

-« O Satanassu, credi ch’ùn t’aghju ricunnisciutu? Allora t’aghju da fà saltà in u me saccu chì hè incantatu, è più putenti chè tè!»

-« Saccu, fà entra subitu à Satanassu »

 

Una volta u diavuli in u saccu, Brancaziu cumanda à u bastonu di minà lu forti, è u bastonu ùn si faci micca prigà! Mena è mena tantu chì u diavuli si metti à briunà, :

-« Lacheti mi sorta, lacheti mi sorta chì mi ni morgu»

-« Bastonu arricheta parpena, hà pagatu abbastanza!»

 -« Chì voli pà lacà mi sorta d’issu saccu maladettu. »

-« Vogliu ch’è tù rendi a vita à tutti i ghjuvanotti chì si sò tombi ghjuchendu à carti contr’à tè, chì sè un furbu è l’a’ tutti spiumati! È po ch’è tù ùn mandi più nimu à strangulà i vichjareddi mì!»

- “Prumettu di fà cusì, ma rendi mi a me libartà!»

 

Satanassu hà tinutu parola. Una massa di ghjovani chì s’erani tombi ani risuscitatu, è Brancaziu li dissi :

 -« Ùn dumandu ringraziamenti d’avè vi resu a vita, ma ci voli à prumetta mi di ùn ghjucà più à carti. Hè detta? Binissimu! Eccu milli scudi par omu in pezzi d’oru. Andeti è circheti di campà travagliendu!»

 

Ѐ cuntenti d’avè fattu u bè à tutti, pinsὸ di vultà si ni in casa di u so babbu Franciscolu chì era di sicuru addispiratu d’avè persu ondici figlioli!

 

Ma da Figari à u Niolu, a strad’hè longa! Ghjuntu in Sartè, scontra un ghjovanu chì si lamintava.

-« Chì ci hè o amicu, parchì tanti lamenti?

-« Ci hè chì u me babbu hè cascatu è s’hè troncu u bracciu. Aghju cercu un medicu, ma comu semu povari è un pudemu pagà, nimu hà vulsutu vena.

-«Sia puru scuciuratu, sò capaci d’aiutà ti. Comu si chjama issu duttori cusì intarissatu?

-« Si chjama u duttori Pindulionu!»

 

-« Duttori Pindulionu, saltà subitu in u me saccu, è tù, Bastonu, dà li unipochi di colpi, chì cusì capisciarà ciò ch’hè d’essa cattivu è avaru!»

 

In u saccu, è techju di colpi di bastonu, u duttori si dumandava ciò chì l’accadi!

Brancaziu u laca sorta è li mostra u ziteddu :

-« U ricunnosci? Ùn sè statu tantu bravu incù u so babbu malatu! Prumetti d’andà subitu à curà lu o ti rimettu in u saccu? »

-« Iè, prumettu di fà tuttu pà variscia lu, è li daraghju ancu qualchì soldi. »

 

In viaghju Brancaziu hà avutu tanti volti l’occasioni di fà u bè incù u so saccu, chì curria a fami nera pà tutti issi lochi.

Ma u so pinseri maiò, era di circa di riveda tutt’i so frateddi morti avanti di ghjunghja ind’è u so babbu, chì saria beddu cuntenti di riveda li tutti vivi.

Ma ùn vali avè pruvatu tanti volti dicendu:

–« Frateddi, salteti in u me saccu!». U saccu ùn si impiia chè d’ossi. Ci voli à pinsà chè u Signori ùn vulia pardunà à tutti u so tradimentu è cattivisimu.

 

U tempu hè passatu! Franciscolu, u babbu, si n’hè mortu, è Brancaziu si n’hè invichjatu.

Avanti di mora anch’eddu, volsi riveda a Fata chì l’avia tantu aiutatu.

 

 S’hè pustatu indù l’avia scuntrata, incù speranza di veda la, ma aspett’è aspetta, è eccu chì si prisentò una vechja spavintevuli, chì tinia di una manu una bandera nera, è di l’altra una falcia bedd’arrutata! Era a Morti :

 

-« Allora, car’amicu, ùn sè ancu stancu d’issa vita? Anc’ ora di di vena cun mè? chì ni dici?

-« O Morti! Hè vera chì sò stancu, chì n’aghju vistu è n’aghju vistu! Tù sè bedd’è brava è vinaraghju cun tè, ma prima aghju bisognu di scuntrà una parsona è ci voli ch’è tù mi lachi un mumentu. »

-« Ùn ci hè paura! Fà a to prighera è veni subitu ch’hè ora!”

-« Allora, s’edd’hè cusì, o Morti, salta subitu in u me saccu è tastarè u me bastonu!»

 

Ѐ eccu a Morti presa in u saccu! U bastonu era prontu à entr’in baddu quandu di colpu, a Fata si prisintò!

-« O chì miraculu! V’aghju tantu circatu! Tantu chjamatu! Sò cusì cuntenti di veda vi!»

-« O Brancà, ti sè sirvutu pà fà u bè di u saccu è u bastonu ch’è t’aviu datu! Sò cuntenta è ti vogliu ricumpinsà! Voli essa chì? Capurali pà cumandà à tutti? Rè o Imperatori? Voli essa riccu, ghjovanu è in saluta? »

-« Innò cara Fata ùn vogliu nudda, ma solamenti chì a Corsica sichi sbarrazata pà sempri d’issi Sarracini chì a spiantani.

-« Hè tuttu ciò ch’è tù dumandi?Allora sarè suddesfu!» Ѐ a fata sparisci di colpu.

 

Brancaziu hè ghjuntu à a fini di a so vita, cuntenti d’i so faccendi è senza rimorsu.

Hà accesu un beddu focu pà scaldà i so ossi frusti, hà fattu sorta a Morti di u saccu, hà ghjittatu saccu è bastonu in u focu, chì nimu ùn si ni pudessi serva pà fà mali.

 

Tandu a Morti, piatttata daret’à un’albitronu si metti à scaccanà, ma Brancaziu, ch’era divintatu cioncu, ùn l’hà mica intesa! Tandu un ghjaddu si missi à cantà :

-« Coucuiacù ! Coucuiacù ! Coucuiacù !»

-« U ghjaddu hà cantatu! Hè l’ora!» dissi a Morti.

Ѐ tandu mena di un colpu di falcia u tintu Brancaziu, è u si purtò à l’altru mondu.